काठमाडौं । संघीय संसदका सदस्यहरूले अब रा.प. तृतीय श्रेणीसरहको स्वकीय सचिव राख्न पाउने भएका छन्। सरकारले गरेको उक्त व्यवस्था नेपाल राजपत्रमा प्रकाशित भएसँगै सांसदहरूले स्वकीय सचिव नियुक्त गर्ने कानुनी आधार सुनिश्चित भएको हो।
कानून, न्याय तथा संसदीय मामिला मन्त्रालयले प्रकाशित गरेको राजपत्रअनुसार प्रतिनिधिसभा र राष्ट्रियसभाका सदस्यहरूले रा.प. तृतीय श्रेणीको एक जना स्वकीय सचिव राख्न पाउने व्यवस्था गरिएको छ। यससँगै सांसदहरूको सचिवालय सञ्चालनमा आवश्यक जनशक्ति व्यवस्थापन गर्न सहज हुने अपेक्षा गरिएको छ।
राजपत्रमा सभामुख र राष्ट्रियसभा अध्यक्षका लागि थप सुविधा पनि व्यवस्था गरिएको छ। उनीहरूले रा.प. प्रथम श्रेणी (विशिष्ट) सरहको एक जना प्रमुख स्वकीय सचिव राख्न पाउनेछन् भने रा.प. द्वितीय र तृतीय श्रेणीका एक–एक जना स्वकीय सचिवसमेत नियुक्त गर्न सक्नेछन्।
त्यसैगरी विपक्षी दलका नेता, प्रतिनिधिसभाका उपसभामुख, राष्ट्रियसभाका उपाध्यक्ष, प्रमुख सचेतक तथा संसदीय समितिका सभापतिले रा.प. द्वितीय श्रेणीसरहको एक जना स्वकीय सचिव राख्न पाउने व्यवस्था लागू गरिएको छ।
राजपत्रअनुसार स्वकीय सचिवालयमा नियुक्त कर्मचारीहरूले सम्बन्धित पदको सुरु स्केलअनुसार मात्र तलब–भत्ता पाउनेछन्। उनीहरूले ऐनबमोजिम प्राप्त गर्ने पारिश्रमिक तथा सुविधा सम्बन्धित कर्मचारीको बैंक खातामार्फत उपलब्ध गराइने व्यवस्था पनि गरिएको छ।
