धरान । नेपाली काँग्रेसकी कोशी प्रदेश सदस्य, कृषि तथा भूमि सुधार विभाग (कोशी प्रदेश) प्रमुख तथा युवा व्यवसायी अञ्जना राई नेतृत्वको टोलीले नेपाली काँग्रेस परित्याग गर्दै साउन ३ गते २१ जना सहित श्रम संस्कृति पार्टीमा प्रवेश गरेका छन् । पार्टी अध्यक्ष हर्क साम्पाङले नवप्रवेशीहरूलाई अविर, खादा तथा श्रमदाताको परिचयपत्र प्रदान गर्दै स्वागत गरेका हुन् ।
पार्टी प्रवेशपछि बोल्दै नेतृ राईले नेपाली काँग्रेसमा लामो समय इमान्दारपूर्वक योगदान गरे पनि पार्टीभित्र देखिएको गुट–उपगुट, कार्यकर्तामैत्री वातावरणको अभाव र सुधारको सम्भावना नदेखिएकाले नयाँ राजनीतिक यात्रा रोज्नुपरेको बताइन् । उनले श्रम संस्कृति पार्टीले अघि सारेको श्रम, इमान्दारिता र देश निर्माणको अभियानबाट प्रभावित भएर पार्टी प्रवेश गरेको स्पष्ट पारिन् ।
आफूले विगत करिब एक दशक नेपाली काँग्रेसको विभिन्न तहमा रहेर काम गरेको उल्लेख गर्दै अब देश निर्माणको अभियानमा नयाँ उत्साहका साथ श्रम संस्कृति पार्टीमार्फत योगदान दिने प्रतिबद्धता व्यक्त गरेकी छन् ।
कार्यक्रमलाई सम्बोधन गर्दै श्रम संस्कृति पार्टीका अध्यक्ष तथा प्रतिनिधिसभा सदस्य हर्क साम्पाङले अन्य दलका कार्यकर्ताहरू श्रम संस्कृति पार्टीमा जोडिनु सकारात्मक संकेत भएको बताए । ‘देश गफले होइन, श्रमले बन्छ । व्यक्तिगत स्वार्थभन्दा माथि उठेर राष्ट्रको हितमा काम गर्ने सोच भएकाहरूका लागि हाम्रो पार्टी खुला छ’, उनले भने । साम्पाङले श्रम संस्कृति पार्टी परिवर्तनको अभ्यासमा विश्वास गर्ने राजनीतिक शक्ति भएको दाबी गर्दै जहाँ पुगे पनि काममार्फत परिवर्तन देखाउने उद्देश्यका साथ अघि बढिरहेको बताए ।
पार्टी प्रवेशको कारणबारे नेतृ राईले अध्यक्ष हर्क साम्पाङको नेतृत्व, स्पष्ट दृष्टिकोण, इमान्दारिता र देश निर्माणप्रतिको प्रतिबद्धताले आफूलाई आकर्षित गरेको बताइन् । उनले अहिले देश निर्माणको अभियानमा श्रम संस्कृति पार्टी अग्रपंक्तिमा रहेको दाबी गर्दै सोही अभियानमा सहयात्री बन्न पार्टी रोजेको उल्लेख गरिन् ।
राईले नेपाली काँग्रेसमा पछिल्लो समय संगठनात्मक विचलन बढ्दै गएको, गुट–उपगुटको राजनीतिले तल्लो तहका कार्यकर्ताको भूमिकालाई कमजोर बनाएको र नयाँ नेतृत्व आए पनि अपेक्षित सुधार हुन नसकेकाले पार्टी परित्याग गर्ने निर्णयमा पुगेको बताइन् ।
अञ्जना राईसहित २१ जनाको प्रवेशलाई श्रम संस्कृति पार्टीले आफ्नो संगठन विस्तारका लागि महत्वपूर्ण उपलब्धिका रूपमा लिएको छ ।
