काठमाडौं। नेपाली कांग्रेसले सहकार्य तोड्ने निर्णय गरेपछि नेकपा एमाले बागमती प्रदेश सरकारबाट बाहिरिने भएको छ। एमाले बागमती प्रदेश संसदीय दलले पार्टीको तर्फबाट सरकारमा सहभागी सबै मन्त्रीलाई तत्काल राजीनामा दिन निर्देशन दिएको हो। यसअघि एमाले केन्द्रीय नेतृत्वले पनि प्रदेश सरकारमा रहेका आफ्ना मन्त्रीलाई राजीनामा दिन निर्देशन दिएको थियो।
बागमती प्रदेशमा कांग्रेस संसदीय दलका नेता इन्द्रबहादुर बानियाँको नेतृत्वमा सरकार रहेको छ। कांग्रेस र एमालेबीचको सत्ता सहकार्य अन्त्य हुने निर्णयसँगै प्रदेश सरकारको राजनीतिक समीकरणमा परिवर्तन आएको हो।
एमालेको तर्फबाट बागमती सरकारमा हाल ६ जना मन्त्री सहभागी छन्। उनीहरूलाई पार्टीको निर्देशनअनुसार पदबाट राजीनामा दिन भनिएको एमाले संसदीय दलले जनाएको छ। मन्त्रीहरूको राजीनामापछि सरकारको संरचना र आगामी राजनीतिक समीकरणबारे चासो बढेको छ।
यसअघि शुक्रबार मुख्यमन्त्री बानियाँले प्रदेश सरकारको मन्त्रालय संख्या १४ बाट घटाएर ८ मा झारेका थिए। मन्त्रालय पुनर्संरचनासँगै एमालेका ६ जना मन्त्रीलाई विना विभागीय बनाइएको थियो। त्यसलगत्तै कांग्रेस–एमाले सहकार्य अन्त्य भएसँगै एमालेले सरकारबाट बाहिरिने निर्णय कार्यान्वयनमा ल्याउन लागेको हो।
