काठमाडौँ । खाद्य प्रविधि तथा गुण नियन्त्रण विभागले प्रयोगशाला परीक्षणमा न्यूनस्तर पुष्टि भएपछि वाईवाईसहित चार ब्रान्डका इन्स्ट्यान्ट चाउचाउका निश्चित ब्याच बजारबाट तत्काल फिर्ता गर्न तथा बिक्री–वितरण रोक्न सम्बन्धित उत्पादक कम्पनीलाई निर्देशन दिएको छ।
विभागका अनुसार बजार अनुगमनका क्रममा सङ्कलन गरिएका नमुनाको परीक्षण गर्दा बर्दियाको बाँसगढी–३ स्थित बी.सी.जी. फुड्स इन्टरप्राइजेज प्रालिबाट उत्पादित चार प्रकारका चाउचाउ खाद्य स्वच्छता तथा गुणस्तर ऐन, २०८१ को दफा १६(क) विपरीत न्यूनस्तरको पाइएको हो। त्यसपछि विभागले ऐनको दफा ३८ को उपदफा (२) बमोजिम सम्बन्धित ब्याचका सबै उत्पादन बजारबाट तत्काल फिर्ता गर्न र उपदफा (४) अनुसार बिक्री–वितरण नगर्न वा नगराउन आदेश जारी गरेको जनाएको छ।
बजारबाट फिर्ता गर्न निर्देशन दिइएका उत्पादनमा गोलमोल ब्रान्डको २५ ग्राम इन्स्ट्यान्ट नुडल्स (ब्याच नं. बी/बीएम२–सी–२०८३.०१.११, उत्पादन मिति २०८३/०१/११), वाईवाई ब्रान्डको ६० ग्राम इन्स्ट्यान्ट नुडल्स (ब्याच नं. बी/बीएम१–एक्स–२०२६–०५–१४, उत्पादन मिति २०२६/०५/१४), प्रिमियम पिरो ब्रान्डको २५ ग्राम इन्स्ट्यान्ट नुडल्स (ब्याच नं. बी/बीएम२–सी–२०८३.०१.२८, उत्पादन मिति २०८३/०१/२८) र मामा ब्रान्डको ६० ग्राम इन्स्ट्यान्ट नुडल्स (ब्याच नं. बी/बीएम१–एक्स–२०२६–०५–१३, उत्पादन मिति २०२६/०५/१३) रहेका छन्।
विभागले उपभोक्तालाई उल्लेखित ब्याच नम्बरका उत्पादन खरिद वा उपभोग नगर्न आग्रह गर्दै सम्बन्धित उत्पादक तथा वितरकलाई तत्काल बजारबाट ती उत्पादन फिर्ता गरी बिक्री–वितरण पूर्ण रूपमा रोक्न निर्देशन दिएको छ। साथै, खाद्य वस्तुको गुणस्तर सुनिश्चित गर्न बजार अनुगमन र प्रयोगशाला परीक्षणलाई निरन्तर कडाइका साथ अघि बढाइने विभागले जनाएको छ।
