काठमाडौं । बुकायो साकाको ह्याट्रिक प्रेरणामा इंग्ल्यान्डले फिफा विश्वकप २०२६ को तेस्रो स्थानका लागि भएको खेलमा फ्रान्सलाई ६–४ ले पराजित गरेको छ। मियामी स्टेडियममा शनिबार राति भएको रोमाञ्चक प्रतिस्पर्धामा पहिलो हाफमा ४–० को अग्रता बनाएको इंग्ल्यान्डले दोस्रो हाफमा फ्रान्सको पुनरागमन प्रयासलाई विफल पार्दै कांस्य पदक जित्यो।
खेलको तेस्रो मिनेटमै डेक्लान राइसले इंग्ल्यान्डलाई अग्रता दिलाएका थिए। १८औं मिनेटमा एज्री कोन्साले अर्को गोल थपे। त्यसपछि बुकायो साकाले ३७औं र पहिलो हाफको इन्जुरी समयमा गोल गर्दै इंग्ल्यान्डलाई विश्रामसम्म ४–० को बलियो अवस्थामा पुर्याए।
दोस्रो हाफमा भने फ्रान्सले उत्कृष्ट पुनरागमनको प्रयास गर्यो। ४८औं मिनेटमा कप्तान किलियन एम्बाप्पेले गोल गर्दै फ्रान्सको खाता खोले। ५४औं मिनेटमा ब्राड्ली बारकोलाले अन्तर ४–२ मा झारे। ६६औं मिनेटमा एम्बाप्पेले व्यक्तिगत दोस्रो गोल गर्दै फ्रान्सलाई एक गोलको दूरीमा ल्याए।
फ्रान्सले बराबरीको अवसर खोजिरहेको बेला ८७औं मिनेटमा मालो गुस्टोले जेड स्पेन्सलाई फल गरेपछि इंग्ल्यान्डले पेनाल्टी पायो। त्यसमा साकाले गोल गर्दै ह्याट्रिक पूरा गरे र टोलीलाई ५–३ को अग्रता दिलाए।
इन्जुरी समयमा उस्मान डेम्बेलेले फ्रान्सका लागि चौथो गोल गरे पनि त्यसको दुई मिनेटपछि जुड बेलिङ्घमले व्यक्तिगत कौशलमा उत्कृष्ट गोल गर्दै इंग्ल्यान्डको ६–४ को जित सुनिश्चित गरे।
यो जितसँगै इंग्ल्यान्डले सन् १९६६ मा घरेलु भूमिमा विश्वकप जितेपछि पहिलो पटक विश्वकपमा शीर्ष तीनभित्र स्थान बनाएको छ। यस्तै, यो खेलसँगै फ्रान्सका मुख्य प्रशिक्षक डिडिएर डेसच्याम्प्सको सफल कार्यकाल पनि समाप्त भएको छ।
साका प्रतियोगिताकै उत्कृष्ट खेलाडी घोषित भए। उनले फाइनलअघिको अन्तिम खेलमा ह्याट्रिक गर्दै इंग्ल्यान्डलाई ऐतिहासिक जित दिलाए।यस खेलमा डेक्लान राइसले खेल सुरु भएको १३४ सेकेन्डमै गोल गर्दै विश्वकपमा इंग्ल्यान्डका लागि दोस्रो सबैभन्दा छिटो गोल गर्ने कीर्तिमान बनाए। यसअघि सन् १९८२ मा ब्रायन रोबसनले फ्रान्सविरुद्ध २८ सेकेन्डमै गोल गरेका थिए।
फ्रान्सका माइकल ओलिसेले प्रतियोगितामा आफ्नो सातौं असिस्ट दर्ता गर्दै विश्वकप इतिहासमा एउटै संस्करणमा सर्वाधिक असिस्ट गर्ने खेलाडी बने। यस्तै, एम्बाप्पेले प्रतियोगितामा १० गोल गर्दै विश्वकप इतिहासमा सर्वाधिक गोलकर्ताको सूचीमा सान्दोर कोचिस (११) र जस्ट फन्टेन (१३) पछाडि तेस्रो स्थानमा उक्लिएका छन्।
