काठमाडौं । प्रधानमन्त्री बालेन शाह र नेपाल राष्ट्र बैंकका गभर्नर डा. विश्वनाथ पौडेलबीच सेयर बजारका विषयमा भएको सकारात्मक छलफलपछि सेयर बजारमा उत्साह देखिएको छ। लामो समयदेखि बजार घट्दा निराश बनेका लगानीकर्तामाझ सरकार बजार सुधार र लगानीकर्ताको मनोबल उच्च राख्ने पक्षमा रहेको सन्देश प्रवाह भएको छ।
यसको प्रत्यक्ष प्रभाव नयाँ आर्थिक वर्ष २०८३/८४ को पहिलो कारोबार दिनमै देखिएको छ। नेपाल स्टक एक्सचेञ्ज (नेप्से) परिसूचक ७९.७४ अङ्कले बढेर २६७७.९४ विन्दुमा पुगेको हो।
नेप्सेको यो वृद्धि नयाँ सरकार गठन भएयताकै सबैभन्दा ठूलो दैनिक वृद्धिमध्ये एक मानिएको छ। कारोबार सुरु भएदेखि नै अधिकांश समूहका सूचक हरियालीमा देखिएपछि बजारमा सकारात्मक वातावरण बनेको छ।
बजारमा आएको सुधारलाई लगानीकर्ताले सरकारको सकारात्मक नीतिगत संकेतसँग जोडेर हेरेका छन्। सेयर बजारलाई थप चलायमान बनाउन आवश्यक नीतिगत सहजीकरण हुने अपेक्षा समेत बढेको छ।
बजार विश्लेषकहरूले पनि सरकार र नियामक निकायबाट सकारात्मक सन्देश प्रवाह हुँदा लगानीकर्ताको आत्मविश्वास बढ्ने र त्यसको प्रभाव बजारमा देखिने बताएका छन्। पछिल्ला दिनको यो उछालले सेयर बजारमा पुनः आशाको वातावरण सिर्जना गरेको छ।
