रसुवा । कृषि उत्पादन वृद्धि गर्दै जिल्लालाई अर्गानिक कृषि उत्पादनमा आत्मनिर्भर बनाउने लक्ष्यसहित डिभिजन सिँचाइ कार्यालय रसुवाले चालु आर्थिक वर्षमा १६ वटा सिँचाइ कुलोको मर्मत तथा स्तरोन्नति गरेको छ। यसबाट एक हजार ६६५ घरधुरीका छ हजार ७०२ किसान प्रत्यक्ष रूपमा लाभान्वित भएका छन्। कार्यालयले एक बहुवर्षीयसहित २१ वटा सिँचाइ आयोजना निर्माण तथा स्तरोन्नतिको काम पनि अघि बढाइरहेको जनाएको छ।
डिभिजन सिँचाइ कार्यालयका प्रमुख सुवास बानियाँका अनुसार किसानको आवश्यकता र स्थानीय मागलाई प्राथमिकतामा राखेर सिँचाइ पूर्वाधार विस्तारलाई तीव्रता दिइएको हो। जिल्लामा रहेको चार हजार ७३८ दशमलव ४० हेक्टर सिँचाइयोग्य जमिनमध्ये हालसम्म तीन हजार ५८१ हेक्टर क्षेत्रमा सिँचाइ सुविधा विस्तार भइसकेको छ। साथै बाढी तथा भूक्षय नियन्त्रणका लागि चालु आर्थिक वर्षमा एक हजार १५३ थान ग्याबिन जाली वितरण गरिएको र आवश्यक स्थानका लागि थप मौज्दात पनि राखिएको कार्यालयले जनाएको छ।
चालु आर्थिक वर्षमा नौकुण्ड गाउँपालिकाको थाङसाप र गुइसा, उत्तरगया गाउँपालिकाको भाँगेखोला, सिधुरेढुङ्गा र साधीखोला तथा कालिका गाउँपालिकाको डिखेत र भदौरे सिँचाइ योजनाको निर्माण सम्पन्न भएपछि थप १५ दशमलव ८ हेक्टर जमिनमा सिँचाइ सुविधा पुगेको छ। किसान तारा पौडेलले नयाँ सिँचाइ कुलो निर्माणपछि धान रोपाइँ सहज हुनुका साथै उत्पादन बढ्ने विश्वास व्यक्त गर्नुभयो।
कार्यालयका अनुसार उत्तरी रसुवाका थाम्बुचेत, गोल्जुङ, चिलिमे तथा तटीय क्षेत्र छोमरुङ र दक्षिणी रसुवाका फाँटमा धान, हिउँदे तरकारी, तोरी, गहुँ तथा अन्य नगदे बाली उत्पादनमा सिँचाइ योजनाले उल्लेखनीय योगदान पुर्याएको छ। नियमित सिँचाइ सुविधाले खेतीयोग्य जमिन बाँझो रहने समस्या घट्नुका साथै वर्षभरि विभिन्न बाली उत्पादन गर्न सहज भएको जनाइएको छ।
सरकारीस्तरबाट योजनाबद्ध सिँचाइ विकासको सुरुआत विसं २०१० को दशकदेखि भएको मानिन्छ। त्यसयता सरकारले नहर, कुलो तथा लिफ्ट सिँचाइ आयोजनामार्फत कृषि उत्पादन वृद्धि, खाद्य सुरक्षा सुदृढीकरण र किसानको आय वृद्धि गर्ने लक्ष्यका साथ सिँचाइ पूर्वाधार विस्तार गर्दै आएको छ। कार्यालयले यस्ता कार्यक्रमले कृषि पेशाप्रति युवाको आकर्षण बढ्नुका साथै रसुवालाई कृषि उत्पादनमा थप आत्मनिर्भर बनाउन महत्वपूर्ण योगदान पुग्ने विश्वास व्यक्त गरेको छ।
