काठमाडौँ । नेपाल आयल निगमले आजदेखि देशभर पुनः १४.२ केजी क्षमताको एलपी ग्यास (एलपीजी) सिलिण्डर बिक्री–वितरण सुरु गरेको जनाएको छ। निगमले बिहीबार जारी गरेको प्रेस विज्ञप्तिमा भारतबाट हुने ग्यास आपूर्तिमा सुधार आएपछि साविककै परिमाणको ग्यास सिलिण्डर उपलब्ध गराउने व्यवस्था मिलाइएको उल्लेख गरेको छ।
निगमका अनुसार इण्डियन आयल कर्पोरेसनका विभिन्न बोटलिङ प्लान्ट तथा रिफाइनरीबाट हुने ग्यास लोडिङको अवस्था सहज बन्दै गएको छ। साथै, उपभोक्ताबाट १४.२ केजी ग्यास सिलिण्डरको उच्च मागलाई ध्यानमा राख्दै मुलुकभर पूर्ण क्षमताको सिलिण्डर भर्ने व्यवस्था पुनः लागू गरिएको हो।
निगमले १४.२ केजी क्षमताको एलपी ग्यास सिलिण्डरको उपभोक्ता मूल्य दुई हजार ६० रुपैयाँ कायम रहेको जनाएको छ। यसअघि आपूर्तिमा देखिएको असहजता र ग्यास अभावका कारण अस्थायी रूपमा ७.१ केजी ग्यास सिलिण्डर भर्ने व्यवस्था गरिएको थियो।
अब आपूर्ति प्रणाली सामान्य बन्दै गएसँगै उपभोक्ताले पुनः १४.२ केजीको भरी सिलिण्डर सहज रूपमा प्राप्त गर्ने निगमले विश्वास व्यक्त गरेको छ। साथै, ग्यासको बिक्री–वितरण नियमित र सहज बनाउन सम्बन्धित ग्यास उद्योग तथा वितरकसँग आवश्यक समन्वय गरिएको पनि निगमले जनाएको छ।
