भक्तपुर । राष्ट्रिय स्वतन्त्र पार्टी (रास्वपा) चाँगुनारायण नगर समिति आगामी स्थानीय तह निर्वाचनको आन्तरिक तयारी र रणनीतिक योजना निर्माणमा सघन रूपमा जुटेको छ । तल्लो तहदेखि माथिल्लो तहसम्मका सांगठनिक अधिवेशनहरू सफलतापूर्वक सम्पन्न गरेसँगै नगर समितिले चुनावी र पालिका विकासको खाका कोर्न सुरु गरेको हो ।
पार्टीको मेरिटोक्रेसी (योग्यता प्रणाली) र खुला आह्वानको नीति अनुरूप नगर समितिले यसअघि नै विज्ञ समूह गठन गरिसकेको छ । उक्त समूहमा आबद्ध सहरी विकास, पूर्वाधार तथा गुरुयोजनाविद्, अर्थशास्त्री, राजस्व रणनीतिकार, सार्वजनिक नीति तथा प्रशासनिक विज्ञ, शिक्षा, स्वास्थ्य र सामाजिक क्षेत्रका जानकारका साथै सम्पदा, पर्यटन र संस्कृतिविद्हरूलाई चाँगुनारायणको वस्तुनिष्ठ योजना बनाउन परिचालन गरिने नगर समितिका सभापति रोशन थापाले जानकारी दिए ।
नगर समितिलाई थप परिपक्व र दूरदर्शी राजनीतिक मार्गनिर्देशन प्रदान गर्न तथा आसन्न निर्वाचनको रणनीतिक तयारीलाई व्यवस्थित बनाउन एक उच्चस्तरीय सल्लाहकार समिति गठनको तयारी समेत अन्तिम चरणमा पुगेको सभापति थापाले बताए ।
उनका अनुसार उक्त सल्लाहकार समितिले चाँगुनारायण नगरपालिकाका ९ वटै वडामा पुगेर त्यहाँका स्थानीय राजनीतिकर्मी, समाजसेवी, पूर्वप्रशासक, व्यवसायी, समाजमा प्रतिष्ठित व्यक्तित्व र विषय विज्ञहरूसँग व्यापक छलफल तथा अन्तरक्रिया सञ्चालन गर्नेछ । तल्लो तहबाट आउने सुझाव र विज्ञ समूहको प्राविधिक दक्षतालाई संयोजन गर्दै चाँगुनारायणको व्यावहारिक र विशेष ५ वर्षे गुरुयोजना निर्माण गर्ने नगर समितिको योजना छ ।
सल्लाहकार समिति र विज्ञ समूहको संयुक्त सुझावका आधारमा रास्वपा चाँगुनारायणले पालिकाको वार्षिक बजेटको लक्ष्य, दिगो विकासको ५ वर्षे मार्गचित्र, सार्वजनिक जग्गा व्यवस्थापनको नीति र स्थानीय तहको आन्तरिक स्रोत पहिचानको रणनीतिक खाका कोर्नेछ । आगामी निर्वाचनमा पार्टीका चुनावी एवं विकासका एजेन्डाहरूलाई केवल गफमा मात्र सीमित नराखी पूर्ण रूपमा तथ्य र तथ्याङ्कमा आधारित बनाइने प्रतिबद्धता सभापति थापाले व्यक्त गरे ।
