काठमाडौँ । पूर्वी नेपालको पर्यटन प्रवर्द्धन गर्ने उद्देश्यले महिला पर्यटन व्यवसायीहरूले प्रवर्द्धनात्मक अभियान सञ्चालन गरेका छन्। नेपाल पर्यटन बोर्डको सहकार्यमा महिला पर्यटन व्यवसायी सञ्जालले कोशी प्रदेशका प्रमुख पर्यटकीय गन्तव्यको अवलोकन गर्दै स्थानीय तह, पर्यटन व्यवसायी तथा समुदायसँग अन्तरक्रिया गरेको हो। असार १८ देखि २१ गतेसम्म सञ्चालन भएको भ्रमणले पूर्वी नेपालको पर्यटन सम्भावनालाई राष्ट्रिय तथा अन्तर्राष्ट्रिय स्तरमा प्रवर्द्धन गर्ने लक्ष्य लिएको छ।
भ्रमणका क्रममा पर्यटन क्षेत्रमा सक्रिय महिला उद्यमीहरूले कोशी प्रदेशका नयाँ तथा स्थापित पर्यटकीय गन्तव्यको अवलोकन गर्नुका साथै स्थानीय सरकार, घरबास (होमस्टे) सञ्चालक, पर्यटन व्यवसायी र सरोकारवालासँग पर्यटन विकासका चुनौती तथा सम्भावनाबारे छलफल गरेका थिए। नेपाल पर्यटन बोर्डका अनुसार यस अभियानले स्थानीय पर्यटनलाई दिगो र व्यवस्थित बनाउने रणनीति तय गर्न सहयोग पुग्ने विश्वास गरिएको छ।
इलामको श्रीअन्तुमा आयोजित कार्यक्रममा महिला पर्यटन व्यवसायी सञ्जालकी अध्यक्ष जया बरालले कोशी प्रदेश प्राकृतिक, धार्मिक र सांस्कृतिक सम्पदाले सम्पन्न क्षेत्र भएकाले कृषि, संस्कृति र स्थानीय जीवनशैलीलाई पर्यटनसँग जोड्दै ‘एग्रो–टुरिजम’को अवधारणा विकास गर्नुपर्नेमा जोड दिइन्। उनले प्रत्येक स्थानीय तहले आफ्ना मौलिक विशेषताको पहिचान गरी एकीकृत पर्यटन प्याकेज निर्माण गर्न सके ग्रामीण अर्थतन्त्र थप सुदृढ हुने धारणा व्यक्त गरिन्।
कार्यक्रममा अन्तु पर्यटन व्यवसायी सङ्घकी कोषाध्यक्ष कञ्चना बरालले अन्तु क्षेत्रमा न्यून बजेटका होमस्टेदेखि सुविधासम्पन्न तारे होटलसम्मको व्यवस्था रहेको जानकारी दिँदै पर्यटन पूर्वाधार विस्तारका लागि सरकारी लगानी बढाउन र स्पष्ट पर्यटन नीति ल्याउन आग्रह गरिन्। त्यस्तै, अन्तुडाँडा सामुदायिक होमस्टेका अध्यक्ष धनकुमार आलेले ग्रामीण पर्यटन विस्तारका लागि होमस्टे सञ्जाललाई थप सुदृढ बनाउनुपर्ने बताए भने सूर्योदय नगरपालिका–५ का वडाध्यक्ष उर्गेन बम्जनले स्थानीय सरकारले सडक, पदमार्ग र पर्यटन पूर्वाधार निर्माणलाई प्राथमिकता दिइरहेको जानकारी दिए।
काठमाडौँबाट सुरु भएको प्रवर्द्धनात्मक भ्रमण टोलीले कोशी ब्यारेज, झापा, इलामको श्रीअन्तु तथा बराहक्षेत्रलगायतका पर्यटकीय गन्तव्यको अवलोकन गरेको थियो। महिला पर्यटन व्यवसायी सञ्जालले यस अभियानले नयाँ गन्तव्यको प्रचारप्रसार, महिला उद्यमशीलताको प्रवर्द्धन तथा पूर्वी नेपालको दिगो पर्यटन विकासमा महत्वपूर्ण योगदान पुग्ने विश्वास व्यक्त गरेको छ।
