जनकपुरधाम । व्यवसायी तथा अभियन्ता दुर्गा प्रसाईंले सिंहदरबारको प्रशासनिक तथा राजनीतिक प्रणाली सरकारमै रहेका व्यक्तिहरूकै कारण कमजोर बनेको आरोप लगाएका छन्। सोमबार पूर्वसांसद धवलशम्शेर राणासँग जनकपुरधाम पुगेका प्रसाईंले सञ्चारकर्मीसँग कुरा गर्दै विगतमा सिंहदरबारमा आगजनी गर्ने व्यक्तिहरू नै अहिले सत्तामा पुगेको दाबी गर्दै त्यसकै प्रभावले राज्य प्रणाली कमजोर बनेको टिप्पणी गरे।
प्रसाईंले वर्तमान सरकारले १०० दिनको कार्यकाल पूरा गरिसकेको उल्लेख गर्दै सरकारको कार्यसम्पादन सन्तोषजनक नरहेको आरोप लगाए। उनले आफूहरूले सरकारको १०० दिने कार्यसम्पादनबारे विस्तृत समीक्षा तयार गरिरहेको र निकट भविष्यमै भिडियोमार्फत सार्वजनिक गर्ने जानकारी दिए।
उनले सरकारको विदेश नीतिप्रति पनि असन्तुष्टि व्यक्त गर्दै वर्तमान गतिविधिले नेपालको अन्तर्राष्ट्रिय सम्बन्धमा नकारात्मक असर परेको दाबी गरे। नेपालमा विगतमा कहिल्यै दलाई लामाको जन्मोत्सव औपचारिक रूपमा नमनाइने गरेको उल्लेख गर्दै अहिले त्यसलाई मनाउन थालिएको भन्दै यसले अन्तर्राष्ट्रिय स्तरमा फरक सन्देश गएको उनको भनाइ थियो।
प्रसाईंले नेपालको परराष्ट्र नीति राष्ट्रिय हित, सार्वभौमिकता र सन्तुलित कूटनीतिक सम्बन्धलाई केन्द्रमा राखेर सञ्चालन हुनुपर्नेमा जोड दिए। उनले सरकारका निर्णय र गतिविधि राष्ट्रिय स्वार्थअनुकूल हुनुपर्ने धारणा व्यक्त गर्दै विदेश नीतिमा संवेदनशीलता अपनाउन आग्रह गरे।
प्रसाईंको मंगलबार जनकपुरधाममा कार्यकर्तासँग भेटघाट गर्ने कार्यक्रम रहेको छ। त्यसक्रममा उनले जानकी मन्दिरमा पूजाअर्चना गर्ने, नगर परिक्रमा गर्दै जुलुस निकाल्ने तथा साँझ जानकी मन्दिर परिसरमा दीप प्रज्वलन कार्यक्रममा सहभागी हुने कार्यतालिका रहेको जनाइएको छ।
