काठमाडौं। राष्ट्रिय स्वतन्त्र पार्टी (रास्वपा) ले पार्टीलाई डिजिटल प्रविधिमैत्री बनाउने अभियानअन्तर्गत विकास गरिएको PulseRSP प्रणालीबारे प्रतिनिधिसभा सदस्यहरूलाई आज अभिमुखीकरण गर्ने भएको छ।
सांसदहरूलाई प्रणालीको प्रयोगसम्बन्धी जानकारी दिनुका साथै साइबर सुरक्षासम्बन्धी सचेतना प्रदान गर्ने उद्देश्यले आज बिहान १०:३० बजे सिंहदरबारस्थित रास्वपा संसदीय दलको कार्यालयमा बैठक आयोजना गरिएको हो। बैठकमा पार्टी सभापति रवि लामिछानेको पनि उपस्थिति रहने जनाइएको छ।
रास्वपाका मुख्य सचेतक कविन्द्र बुर्लाकोटीद्वारा जारी सूचनाअनुसार अभिमुखीकरणपछि प्रत्येक सांसदले आफ्ना गतिविधि अनिवार्य रूपमा PulseRSP प्रणालीमा अद्यावधिक गर्नुपर्नेछ। सांसदहरूबीच भेटघाटका लागि अनलाइनमार्फत समय माग गर्न सकिने, संसदमा उठाउने विषयवस्तु प्रणालीमै राख्नुपर्ने तथा निर्वाचन क्षेत्रमा भएका भ्रमण, भेटघाट र अन्य गतिविधिको विवरणसमेत नियमित रूपमा पोर्टलमा अद्यावधिक गर्नुपर्ने व्यवस्था गरिएको छ।
त्यस्तै, नागरिकले आफ्ना निर्वाचन क्षेत्रका सांसदसँग यही प्रणालीमार्फत गुनासा तथा सुझाव दर्ता गर्न सक्नेछन्। ती गुनासोको ट्र्याकिङ हुने, समाधान प्रक्रियाको अनुगमन गर्न सकिने तथा सोही आधारमा सांसदहरूको कार्यसम्पादन मूल्याङ्कन गर्ने फिचर पनि प्रणालीमा समावेश गरिएको रास्वपाले जनाएको छ।
रास्वपाले PulseRSP प्रणालीमार्फत पार्टीको आन्तरिक व्यवस्थापन, संसदीय गतिविधि, जनप्रतिनिधिको जवाफदेहिता र नागरिकसँगको सम्पर्कलाई थप प्रभावकारी, पारदर्शी र प्रविधिमैत्री बनाउने लक्ष्य लिएको जनाएको छ। सोही उद्देश्यका साथ आयोजित अभिमुखीकरण कार्यक्रममा सबै प्रतिनिधिसभा सदस्यको अनिवार्य उपस्थितिका लागि निर्देशनअनुसार अनुरोध गरिएको छ।
