काठमाडाैं। यातायात व्यवस्था विभागले पेट्रोलियम पदार्थको मूल्यमा गिरावट आएसँगै अन्तरप्रदेश चल्ने सार्वजनिक तथा मालवाहक सवारीसाधनको भाडादर दुई प्रतिशतले घटाएको छ।
नेपाल आयल निगमले गत असार १७ गते मध्यरातिदेखि लागू हुने गरी डिजेल र मट्टितेलको मूल्यमा प्रतिलिटर ४२ रुपैयाँ कटौती गरेपछि विभागले स्वचालित मूल्य प्रणालीका आधारमा नयाँ भाडादर कायम गरेको हो। बिहीबार सार्वजनिक सूचना जारी गर्दै विभागले यो परिमार्जित भाडादर आजैका मितिदेखि देशभरका लामो दूरीका सवारीसाधनमा लागू हुने स्पष्ट पारेको छ।
विभागले यसअघि भाडादर समायोजन गर्दा डिजेलको औसत बजार मूल्य प्रतिलिटर २३५ रुपैयाँ ८३ पैसा रहेको थियो। तर, पछिल्लो समय अन्तर्राष्ट्रिय बजारमा कच्चा तेलको मूल्यमा आएको गिरावट र नयाँ मूल्यसूची अनुसार नेपालमा डिजेलको मूल्य प्रतिलिटर १९३ रुपैयाँ ८३ पैसा कायम भएपछि भाडा घटाइएको हो।
यसअघि विसं २०८३ वैशाख १२ गतेको मन्त्रिस्तरीय निर्णयले इन्धनको मूल्य वृद्धिलाई आधार मानी सार्वजनिक तथा मालवाहक सवारीसाधनको भाडादर पाँच प्रतिशतले बढाएको थियो।
नेपाल राष्ट्रिय यातायात व्यवसायी महासङ्घका अध्यक्ष पुण्यप्रसाद सिटौला (सरोज) ले इन्धनको मूल्य घटेअनुसार विभागले भाडादर दुई प्रतिशतले घटाएको पुष्टि गर्नुभयो। इन्धनको मूल्यमा न्यूनतम पाँच प्रतिशत वा सोभन्दा बढी उतारचढाव हुँदा यातायात व्यवस्था विभागले वैज्ञानिक भाडादर निर्धारण प्रणाली अनुसार भाडा समायोजन गर्दै आएको छ।
यो भाडादर दुई वा दुईभन्दा बढी प्रदेश भई सञ्चालन हुने राष्ट्रिय रुटका यात्रुवाहक तथा मालवाहक सवारीसाधनमा मात्र लागू हुनेछ। स्थानीय रुट तथा एउटै प्रदेशभित्र चल्ने सवारीसाधनको भाडादर भने सम्बन्धित प्रदेश सरकार र स्थानीय तहले नै इन्धनको नयाँ मूल्यका आधारमा छुट्टै समायोजन गर्नुपर्ने कानुनी व्यवस्था रहेको छ।
