काठमाडौँ। राष्ट्रिय स्वतन्त्र पार्टी (रास्वपा) का पहिलो महाधिवेशनबाट निर्वाचित पदाधिकारी तथा केन्द्रीय सदस्यले बुधबार पद तथा गोपनीयताको शपथ लिएका छन्।
वनस्थलीस्थित रास्वपाको केन्द्रीय कार्यालयमा आयोजित कार्यक्रममा पार्टी सभापति रवि लामिछाने ले नवनिर्वाचित पदाधिकारी र केन्द्रीय सदस्यलाई पद तथा गोपनीयताको शपथ गराएका हुन्। पहिलो महाधिवेशनबाट ९९ जना केन्द्रीय सदस्य निर्वाचित भएका छन्।
महाधिवेशनबाट सभापतिमा रवि लामिछाने र उपसभापतिमा डा. स्वर्णिम वाग्ले निर्विरोध निर्वाचित भएका थिए। त्यसैगरी उपसभापतिमा सोविता गौतम, महामन्त्रीमा विपिन आचार्य, सहमहामन्त्रीमा हरि ढकाल, असिम शाह र निशा डाँगी निर्वाचित भएका छन्।
रास्वपाको विधानअनुसार वरिष्ठ नेतासहित ११ जना पदाधिकारी मनोनीत गर्ने व्यवस्था रहेको छ। साथै, सभापतिले ५१ जना केन्द्रीय सदस्य मनोनयन गर्ने अधिकार पनि राख्ने व्यवस्था छ।
रास्वपाको पहिलो महाधिवेशन असार ७ गते चितवनमा सुरु भएको थियो। करिब ६ दिनसम्म सञ्चालन भएको महाधिवेशनबाट निर्वाचित पदाधिकारी तथा केन्द्रीय सदस्यले बुधबार औपचारिक रूपमा शपथ ग्रहणसँगै आफ्नो कार्यकाल प्रारम्भ गरेका हुन्। सभापति रवि लामिछानेले भने महाधिवेशनस्थलमै यसअघि नै पद तथा गोपनीयताको शपथ लिइसकेका थिए।
