रास्वपाका नवनिर्वाचित पदाधिकारी र केन्द्रीय सदस्यको शपथ आज

रास्वपाका महामन्त्री विपिन आचार्यका अनुसार शपथग्रहण कार्यक्रम बिहान ११ बजे पार्टीको घण्टीघरस्थित केन्द्रीय कार्यालयमा हुनेछ। शपथ सम्पन्न भएपछि नवगठित केन्द्रीय समितिको पहिलो बैठक बस्नेछ। बैठकमा पार्टीका मनोनीत पदाधिकारी, केन्द्रीय सदस्य तथा संगठन विस्तारसँग सम्बन्धित विषयमा छलफल हुने जनाइएको छ।

रास्वपाले गत असार ७ देखि १२ गतेसम्म चितवनको भरतपुरमा पहिलो राष्ट्रिय महाधिवेशन आयोजना गरेको थियो। महाधिवेशनबाट पार्टी सभापतिमा रवि लामिछाने निर्विरोध निर्वाचित भएका थिए भने अन्य पदाधिकारी र केन्द्रीय सदस्य पनि निर्वाचन प्रक्रियामार्फत चयन भएका थिए।

सभापति लामिछानेले भने महाधिवेशनकै क्रममा भरतपुरमा पद तथा गोपनीयताको शपथ लिइसकेका छन्। आजको शपथग्रहणसँगै नयाँ नेतृत्वले औपचारिक रूपमा जिम्मेवारी सम्हाल्नेछ भने पार्टीले आगामी संगठनात्मक कार्ययोजना र राजनीतिक रणनीतिलाई अघि बढाउने तयारी गरेको छ।