काठमाडौं । नेपाल आयल निगमले पेट्रोलियम पदार्थको मूल्य घटाएको छ। अन्तर्राष्ट्रिय बजारमा पेट्रोलियम पदार्थको खरिद मूल्य घटेर आएपछि निगमले स्वचालित मूल्य प्रणालीअनुसार नयाँ मूल्य समायोजन गरेको हो।
निगमका अनुसार भारतको इन्डियन आयल कर्पोरेशन (आईओसी)बाट प्राप्त नयाँ खरिद मूल्यका आधारमा पेट्रोलको मूल्य प्रतिलिटर २० रुपैयाँ, डिजेल/मट्टितेलको मूल्य प्रतिलिटर ३० रुपैयाँ तथा खाना पकाउने एलपी ग्यासको मूल्य प्रतिसिलिन्डर १०० रुपैयाँ ले घटाइएको छ। समायोजित मूल्य २०८३ असार १७ गते (१ जुलाई २०२६) बिहान १२:०१ बजेदेखि लागू हुनेछ।
नयाँ मूल्यअनुसार पहिलो वर्गका क्षेत्रमा पेट्रोल प्रतिलिटर १९४ रुपैयाँ ५० पैसा, दोस्रो वर्गमा १९६ रुपैयाँ र तेस्रो वर्गमा १९७ रुपैयाँ कायम गरिएको छ। त्यसैगरी डिजेल/मट्टितेलको मूल्य पहिलो वर्गमा १९२ रुपैयाँ ५० पैसा, दोस्रो वर्गमा १९४ रुपैयाँ र तेस्रो वर्गमा १९५ रुपैयाँ प्रतिलिटर कायम गरिएको निगमले जनाएको छ।
यस्तै, खाना पकाउने एलपी ग्यासको मूल्य प्रतिसिलिन्डर २,०६० रुपैयाँ कायम गरिएको छ, जुन साविकको मूल्यभन्दा १०० रुपैयाँ कम हो। नेपाल आयल निगमले अन्तर्राष्ट्रिय बजारमा भएको मूल्य परिवर्तनका आधारमा स्वचालित मूल्य प्रणालीअनुसार समय–समयमा इन्धनको मूल्य समायोजन गर्दै आएको जनाएको छ।
