काठमाडौँ । निजी दूरसञ्चार सेवा प्रदायक एनसेलले सेवा स्तरोन्नतिको योजनाअनुसार विभिन्न जिल्लाका स्थानीय तहमा यही असार २२ गतेदेखि थ्रीजी सेवा बन्द गर्ने जनाएको छ ।
कम्पनीले सूचना जारी गर्दै नयाँ प्रविधि अपनाई गुणस्तरीय सेवा विस्तार गर्न थ्रीजी सेवा क्रमशः बन्द गर्न लागिएको जनाएको छ । थ्रीजी सेवा बन्द भएपछि ग्राहकलाई फोरजी तथा भीओएलटीई सेवा प्रयोग गर्न एनसेलले आग्रह गरेको छ ।
एनसेलका अनुसार भीओएलटीई सेवा निःशुल्क सक्रिय गर्न *123*91# डायल गरी मोबाइलको सेटिङमा गएर भीओएलटीई अन गर्नुपर्नेछ ।
कम्पनीले हाल देशको करीब ७५ प्रतिशत जनसंख्यासम्म फोरजी नेटवर्क विस्तार भइसकेको उल्लेख गर्दै आगामी दिनमा उच्च गुणस्तरको भ्वाइस र डेटा सेवा उपलब्ध गराउने प्रतिबद्धता जनाएको छ ।
थ्रीजी सेवा बन्द हुने क्षेत्रका ग्राहकलाई समयमै फोरजी र भीओएलटीई सेवा सक्रिय गरी सहज रूपमा सेवा लिन पनि एनसेलले अनुरोध गरेको छ ।
