काठमाडौं । संघीय संसदअन्तर्गत प्रतिनिधिसभाको आइतबार बिहान ११:०० बजे बस्ने बैठकमा सरकारका तर्फबाट विभिन्न महत्वपूर्ण प्रतिवेदन तथा विधेयकहरू प्रस्तुत गर्ने कार्यसूची तय गरिएको छ।
बैठकमा प्रधानमन्त्रीको तर्फबाट कानून, न्याय तथा संसदीय मामिला मन्त्रीले ‘महालेखा परीक्षकको ६३औँ वार्षिक प्रतिवेदन, २०८३’ प्रतिनिधिसभामा पेस गर्नेछन्। साथै, उनले ‘सार्वजनिक खरिद (दोस्रो संशोधन) विधेयक, २०८३’ प्रस्तुत गर्न अनुमति माग्दै उक्त विधेयक सदनमा दर्ता गर्ने प्रस्ताव पनि पेश गर्ने कार्यसूची रहेको छ।
त्यसैगरी, अर्थमन्त्री डा. वाग्लेले ‘सम्पत्ति शुद्धीकरण (मनी लाउण्डरिङ्ग) निवारण (तेस्रो संशोधन) विधेयक, २०८३’ प्रस्तुत गर्नेछन्। भूमि व्यवस्था, सहकारी, सङ्घीय मामिला तथा सामान्य प्रशासन मन्त्रीले ‘सहकारी (पहिलो संशोधन) विधेयक, २०८३’ पेस गर्नेछन् भने स्वास्थ्य तथा खाद्य स्वच्छता मन्त्रीले ‘स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने विधेयक, २०८३’ सदनमा प्रस्तुत गर्ने कार्यक्रम रहेको छ।
यसैबीच, बैठकमा बजेटसँग सम्बन्धित विधेयकहरूलाई पनि टुंगो लगाउने तयारी गरिएको छ। अर्थमन्त्री डा. वाग्लेले ‘आर्थिक विधेयक, २०८३’ माथि प्राप्त संशोधनहरू निर्णयार्थ प्रस्तुत गर्दै उक्त विधेयक पारित गरियोस् भन्ने प्रस्ताव प्रतिनिधिसभासमक्ष राख्ने कार्यसूची रहेको छ।
