दिक्तेल। नेकपा (एमाले) जिल्ला कमिटी खोटाङको दशौं पूर्ण बैठक दिक्तेलमा सम्पन्न भएको छ। बैठकले पार्टी संगठनलाई थप सुदृढ बनाउने, कार्यकर्तालाई सक्रिय बनाउने तथा केन्द्रले अघि सारेको ‘मिसन जागरण अभियान’लाई जिल्लाभर प्रभावकारी रूपमा सञ्चालन गर्ने निर्णय गरेको छ।
राष्ट्रगानबाट सुरु भएको बैठक जिल्ला अध्यक्ष देवबिक्रम राईको अध्यक्षतामा सम्पन्न भएको थियो। उपाध्यक्ष कुमार आचार्यले स्वागत मन्तव्य राख्नुभएको कार्यक्रममा जिल्ला सचिव सुरेन्द्र राईले बैठक सञ्चालन गर्नुभएको थियो। बैठकको प्रारम्भमा देश र लोकतान्त्रिक आन्दोलनका क्रममा जीवन उत्सर्ग गर्ने सम्पूर्ण शहीदहरूप्रति श्रद्धाञ्जली अर्पण गर्दै एक मिनेट मौनधारण गरिएको थियो।
बैठकमा तत्कालीन नेकपा (एकीकृत समाजवादी) का नगर अध्यक्ष यादवशेन राई औपचारिक रूपमा नेकपा (एमाले) मा समाहित हुनुभएको घोषणा गरिएको छ। उहाँको पार्टी प्रवेशले जिल्लामा एमालेको संगठन थप मजबुत बन्ने विश्वास व्यक्त गरिएको छ। साथै, अन्य राजनीतिक पृष्ठभूमिबाट आएका तथा लामो समयदेखि निष्क्रिय रहेका नेता–कार्यकर्तालाई पनि पार्टीको मूलधारमा समेट्दै संगठन विस्तारलाई तीव्रता दिने रणनीति तय गरिएको जनाइएको छ।
त्यसैगरी, विगतमा विभिन्न कारणले पार्टीको औपचारिक जिम्मेवारीमा नरहनुभएका दर्जनौं नेता–कार्यकर्तालाई उनीहरूको अनुभव, क्षमता र योगदानका आधारमा उपयुक्त जिम्मेवारी दिने निर्णय बैठकले गरेको छ। आगामी दिनमा वडा, पालिका तथा जिल्ला तहसम्म पार्टी संगठनलाई थप चलायमान बनाउँदै जनतासँग प्रत्यक्ष संवाद बढाउने, सदस्यता विस्तार, संगठन सुदृढीकरण र जनपरिचालनलाई प्राथमिकतामा राखेर केन्द्रले घोषणा गरेको ‘मिसन जागरण अभियान’ प्रभावकारी रूपमा सञ्चालन गर्ने विस्तृत कार्ययोजना समेत बैठकले पारित गरेको जनाएको छ।
