काठमाडौं । राष्ट्रिय स्वतन्त्र पार्टी (रास्वपा)को प्रथम राष्ट्रिय महाधिवेशनबाट निर्वाचित पदाधिकारी तथा केन्द्रीय सदस्यहरूको शपथग्रहण कार्यक्रम आज साँझ हुने भएको छ। पार्टीले जारी गरेको सूचनाअनुसार शपथग्रहण कार्यक्रम साँझ ६ः३० बजे महाधिवेशनस्थलको सभाहलमा आयोजना गरिनेछ।
रास्वपाले पहिलोपटक आयोजना गरेको राष्ट्रिय महाधिवेशनबाट शनिबार निर्वाचन प्रक्रियामार्फत ९९ जना केन्द्रीय सदस्य निर्वाचित भएका छन्। महाधिवेशनले नयाँ नेतृत्व चयनका लागि मतदान सम्पन्न गरेपछि अहिले पार्टीका पदाधिकारीहरूको मतगणना जारी रहेको छ। मतगणना अन्तिम चरणमा पुगेको र त्यसपछि पदाधिकारीहरूको आधिकारिक नतिजा सार्वजनिक गरिने निर्वाचन समितिले जनाएको छ।
निर्वाचन प्रक्रियाअन्तर्गत अध्यक्षसहित विभिन्न पदाधिकारी पदका लागि दोस्रो चरणमा मतदान भएको थियो। हालसम्म सार्वजनिक भएको मतपरिणामअनुसार अधिकांश प्रमुख नेताहरूले उल्लेख्य मत प्राप्त गरेका छन्। अन्तिम परिणाम सार्वजनिक भएपछि निर्वाचित पदाधिकारीहरूलाई केन्द्रीय सदस्यहरूसँगै सामूहिक रूपमा शपथ गराइने कार्यक्रम तय गरिएको छ।
रास्वपाले महाधिवेशनमार्फत पार्टीको नयाँ केन्द्रीय नेतृत्व चयन गर्दै आगामी संगठन विस्तार, नीति निर्माण र राजनीतिक कार्यदिशा तय गर्ने तयारी गरेको छ। नयाँ नेतृत्वको चयनसँगै पार्टीले संगठनलाई थप सुदृढ बनाउने, स्थानीय तहदेखि केन्द्रसम्म संगठनात्मक संरचना मजबुत बनाउने तथा आगामी निर्वाचनलाई लक्षित गर्दै राजनीतिक गतिविधि तीव्र बनाउने अपेक्षा गरिएको छ।
महाधिवेशनलाई रास्वपाले आफ्नो संगठनात्मक विकासको महत्वपूर्ण चरणका रूपमा लिएको छ। नयाँ नेतृत्वले शपथ ग्रहण गरेसँगै औपचारिक रूपमा कार्यभार सम्हाल्नेछ भने महाधिवेशनबाट पारित नीति तथा कार्यक्रम कार्यान्वयन गर्ने जिम्मेवारी पनि नयाँ नेतृत्वको काँधमा रहनेछ।
पार्टीका अनुसार पदाधिकारीको मतगणना सम्पन्न भएलगत्तै अन्तिम नतिजा सार्वजनिक गरिनेछ र त्यसपछि आजै साँझ निर्वाचित पदाधिकारी तथा ९९ जना केन्द्रीय सदस्यहरूको सामूहिक शपथग्रहण कार्यक्रम सम्पन्न हुनेछ।
