चितवन । राष्ट्रिय स्वतन्त्र पार्टी (रास्वपा) की नेतृ तथा पूर्व उपसभामुख इन्दिरा राना मगर ले पार्टीको उपसभापति पदमा उम्मेदवारी दर्ता गराएकी छन्। उनले महिला उपसभापति पदका लागि उम्मेदवारी दिएको जानकारी दिँदै प्रतिनिधिहरूसँग आफ्नो पक्षमा मत मागेकी छन्।
रास्वपाको विधानअनुसार पार्टीमा तीन जना उपसभापति रहने व्यवस्था रहेको छ। तीमध्ये एक पदमा महिला अनिवार्य गरिएको छ। सोही व्यवस्थाअनुसार राना मगरले आफ्नो उम्मेदवारी प्रस्तुत गरेकी हुन्।
उम्मेदवारी दर्तापछि उनले पार्टीलाई थप सुदृढ, समावेशी र जनउत्तरदायी बनाउन आफूले भूमिका खेल्ने प्रतिबद्धता व्यक्त गर्दै प्रतिनिधिहरूसँग समर्थनको अपिल गरेकी छन्। उनले पार्टीको संगठन विस्तार र नीति निर्माणमा सक्रिय योगदान दिने प्रतिबद्धता समेत जनाएकी छन्।
रास्वपाको प्रथम राष्ट्रिय महाधिवेशनअन्तर्गत आज केन्द्रीय सदस्यहरूको निर्वाचन हुँदैछ। पार्टीको व्यवस्थाअनुसार निर्वाचित केन्द्रीय सदस्यहरूमध्येबाट पदाधिकारी चयन गरिनेछ। महाधिवेशनका गतिविधिसँगै नेतृत्व चयन प्रक्रिया पनि तीव्र बनेको छ।
