चितवन । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशन अन्तर्गत दलित क्लस्टर मार्फत केन्द्रीय सदस्य पदका उम्मेदवार साजन विकले प्रतिनिधिहरूसँग आफूलाई मतदान गरी विजयी बनाउन अपिल गरेका छन्।
सामाजिक सञ्जालमार्फत उनले महाधिवेशनलाई पार्टीको भावी नेतृत्व र दिशानिर्देशन तय गर्ने ऐतिहासिक अवसरका रूपमा व्याख्या गर्दै विवेकपूर्ण मत प्रयोग गर्न आग्रह गरेका हुन्।
विकेले पार्टीभित्र युवा नेतृत्वको स्थापना गर्दै सुशासन, समृद्धि र उन्नत लोकतन्त्रको जग बलियो बनाउन आफू प्रतिबद्ध रहेको बताएका छन्। उनले आफ्नो उम्मेदवारी केवल व्यक्तिगत आकांक्षा नभई समावेशी प्रतिनिधित्व र संगठनलाई थप सुदृढ बनाउने अभियानको हिस्सा भएको उल्लेख गरेका छन्।
भक्तपुरका विकेले आफूले हासिल गरेको सांगठनिक अनुभव र दलित समुदायको प्रतिनिधित्वलाई आधार बनाएर केन्द्रीय सदस्य पदमा उम्मेदवारी दिएको बताएका छन्। उनले गुट र भागबन्डाभन्दा माथि उठेर योग्यता, क्षमता र योगदानको मूल्यांकन गर्दै मतदान गर्न प्रतिनिधिहरूसँग अनुरोध गरेका छन्।
महाधिवेशनको मतदानपूर्व जारी अपिलमा उनले प्रतिनिधिहरूको विश्वासलाई कहिल्यै टुट्न नदिने प्रतिबद्धता व्यक्त गर्दै आफ्नो पक्षमा मत दिन आग्रह गरेका छन्। रास्वपाको प्रथम महाधिवेशनअन्तर्गत विभिन्न पदका लागि उम्मेदवारहरूले यतिबेला प्रतिनिधिहरूसँग मत माग्ने अभियानलाई तीव्र बनाएका छन्।
