चितवन । राष्ट्रिय स्वतन्त्र पार्टी (रास्वपा) का सभापति रवि लामिछाने ले प्रथम राष्ट्रिय महाधिवेशनमा सहभागी प्रतिनिधिहरूसँग लिइँदै आएको प्रतिनिधि शुल्क नलिन पार्टीका सम्बन्धित निकायलाई निर्देशन दिएका छन्।
चितवनमा जारी महाधिवेशनको अवधि अपेक्षाभन्दा लम्बिएको अवस्थालाई मध्यनजर गर्दै लामिछानेले प्रतिनिधिहरूले बुझाउनुपर्ने पाँच हजार रुपैयाँ शुल्क अब अनिवार्य नरहेको स्पष्ट पारेका हुन्। साथै, यसअघि शुल्क बुझाइसकेका आर्थिक रूपमा असहज अवस्थामा रहेका प्रतिनिधिहरूले आवश्यक प्रक्रिया पूरा गरी रकम फिर्ता लिन सक्ने व्यवस्था गरिएको पार्टीले जनाएको छ।
महाधिवेशनमा सहभागी प्रतिनिधिहरूलाई बसोबास, खानपिन तथा अन्य व्यवस्थापनसम्बन्धी कुनै समस्या परे तत्काल सम्बन्धित संयन्त्रमा सम्पर्क गर्न पनि आग्रह गरिएको छ। प्रतिनिधिहरूलाई सहज वातावरणमा महाधिवेशनमा सहभागी गराउने उद्देश्यले आवश्यक सहजीकरण तथा व्यवस्थापनलाई थप प्रभावकारी बनाइएको बताइएको छ।
चितवनमा जारी रास्वपाको प्रथम राष्ट्रिय महाधिवेशनमा देशभरबाट आएका प्रतिनिधिहरू नेतृत्व चयन, संगठन सुदृढीकरण, नीतिगत बहस तथा आगामी राजनीतिक कार्यदिशाबारे छलफलमा जुटेका छन्। महाधिवेशनको समयावधि लम्बिएसँगै प्रतिनिधिहरूको आवास, भोजन र समग्र व्यवस्थापनको विषय पनि विशेष चासोको केन्द्र बनेको छ।
