चितवन । राष्ट्रिय स्वतन्त्र पार्टी (रास्वपा) को महाधिवेशन उद्घाटन समारोह विभिन्न राजनीतिक दलका शीर्ष नेताहरूको उपस्थितिमा सम्पन्न भएको छ। कार्यक्रममा सहभागी नेताहरूले रास्वपाको आगामी यात्राका लागि शुभकामना व्यक्त गर्दै संविधान संशोधन, सुशासन र वैकल्पिक राजनीतिको आवश्यकता बारे धारणा राखेका छन्।
उद्घाटन समारोहलाई सम्बोधन गर्दै जनता समाजवादी पार्टी नेपालका अध्यक्ष उपेन्द्र यादव ले रास्वपालाई संविधान संशोधनको एजेण्डामा अग्रसर हुन आग्रह गरे। उनले वर्तमान संविधानका केही पक्ष सुधार र परिमार्जन आवश्यक रहेको उल्लेख गर्दै त्यसका लागि रास्वपाले रचनात्मक भूमिका खेल्नुपर्ने बताए। यादवले रास्वपालाई देशलाई नयाँ दिशामा अघि बढाउने अभियानमा सफलता मिलोस् भन्ने शुभकामना पनि दिए।
यस्तै, राष्ट्रिय प्रजातन्त्र पार्टीका अध्यक्ष राजेन्द्र लिङ्देन ले पनि संविधान संशोधनको विषयलाई प्राथमिकतामा राख्न सुझाव दिए। उनले रास्वपाले प्राप्त गरेको जनसमर्थनमा विभिन्न राजनीतिक धारका मतदाताको योगदान रहेको उल्लेख गर्दै “कतिपय मतदाता काठमाडौं महानगरपालिकाका प्रमुख बालेन्द्र शाह (बालेन) ले राजसंस्था फर्काउने अपेक्षासमेत राखेर रास्वपालाई मतदान गरेका थिए” भन्ने टिप्पणी गरे।
नेपाल कम्युनिष्ट पार्टी (माओवादी केन्द्र) का उपमहासचिव वर्षमान पुन ले रास्वपा र आफ्नो पार्टीबीच धेरै विषयमा समानता रहेको बताए। सुशासन, भ्रष्टाचारविरुद्धको अभियान र जनताका आकांक्षालाई सम्बोधन गर्ने सवालमा दुवै पक्षबीच साझा उद्देश्य रहेको उनको भनाइ थियो।
जनमत पार्टीका अध्यक्ष सीके राउतले तत्कालिन काठमाडौं महानगरपालिकाका प्रमुख बालेन्द्र शाह तथा हालका प्रधानमन्त्री शाहकाे प्रशंसा गर्दै वर्तमान राजनीतिक नेतृत्व शैलीप्रति टिप्पणी गरे। उनले “प्रधानमन्त्री फरक लेबलका मात्र भएर हुँदैन, काम र सोचमा पनि फरकपन देखिनुपर्छ” भन्ने आशय व्यक्त गर्दै नयाँ पुस्ताको नेतृत्वप्रति जनताको आकर्षण बढिरहेको बताए।
महाधिवेशन उद्घाटन समारोहमा विभिन्न दलका नेताहरूले रास्वपालाई शुभकामना दिँदै लोकतन्त्रको सुदृढीकरण, सुशासन, आर्थिक समृद्धि र संविधानको प्रभावकारी कार्यान्वयनका लागि सहकार्यको आवश्यकता औँल्याएका थिए। नेताहरूका मन्तव्यले संविधान संशोधन, वैकल्पिक राजनीति र नयाँ नेतृत्वप्रतिको जनअपेक्षालाई पुनः केन्द्रमा ल्याएको छ।
