चितवन। राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशन आजदेखि चितवनको गेष्टहाउस चौरमा सुरु हुँदैछ। महाधिवेशनमा देशभरका सातै प्रदेश, ७७ जिल्ला तथा ७५३ स्थानीय तहबाट प्रतिनिधि, नेता तथा कार्यकर्ताहरू चितवन पुगिसकेको रास्वपाले जनाएको छ।
महाधिवेशनको उद्घाटन सत्रमा प्रधानमन्त्री बालेन शाहसहित विभिन्न राजनीतिक दलका शीर्ष नेताहरूको सहभागिता रहने बताइएको छ। उद्घाटन समारोहमा ठूलो जनसहभागिता हुने अपेक्षा गरिएको छ भने यसका कारण चितवनका अधिकांश होटलहरू भरिभराउ भएका छन्।
रास्वपाका अनुसार महाधिवेशनमा देशभरबाट पचासौं हजार नेता, कार्यकर्ता तथा समर्थकहरूको सहभागिता रहनेछ। उद्घाटन समारोहमा उल्लेख्य भीड हुने अनुमान गरिएकाले जिल्ला सुरक्षा निकायले विशेष सुरक्षा व्यवस्था मिलाएको जनाएको छ।
यसैबीच, महाधिवेशनको उद्घाटन सत्रमा नेकपाका अध्यक्ष तथा पूर्वप्रधानमन्त्री प्रचण्डको प्रतिनिधित्व गर्दै नेता वर्षमान पुन ‘अनन्त’ सहभागी हुने भएका छन्। रास्वपाले प्रचण्डलाई उद्घाटन समारोहमा सहभागी हुन निमन्त्रणा पठाएको थियो। तर स्वास्थ्य अवस्था पूर्ण रूपमा सुधार नभएकाले प्रचण्ड स्वयं उपस्थित हुन नसक्ने भएपछि नेता वर्षमान पुनलाई शुभकामना सन्देशसहित पठाउने निर्णय गरिएको नेकपा स्रोतले जनाएको छ।
नेता वर्षमान पुनले आफू रास्वपाको महाधिवेशनमा शुभकामना दिन आज बिहानै चितवन जाने तयारी गरेको बताएका छन्।
रास्वपाको पहिलो राष्ट्रिय महाधिवेशनलाई पार्टीको भावी नेतृत्व चयन, संगठन सुदृढीकरण तथा आगामी राजनीतिक कार्यदिशा तय गर्ने महत्वपूर्ण अवसरका रूपमा हेरिएको छ।
