चितवन । राष्ट्रिय स्वतन्त्र पार्टी (रास्वपा) को केन्द्रीय समितिको बैठक आज (शनिबार) चितवनमा बस्दैछ।
पार्टीका महामन्त्री कविन्द्र बुर्लाकोटीका अनुसार बैठक दिउँसो १ बजे भरतपुरस्थित होटल सीएमटीको बैठक हलमा आयोजना गरिएको छ।
बैठकमा आगामी राष्ट्रिय महाधिवेशनको तयारीलाई मुख्य प्राथमिकताका साथ छलफल गरिने जनाइएको छ। साथै महाधिवेशन प्रतिनिधि चयन, महाधिवेशनमा प्रस्तुत गरिने विभिन्न प्रतिवेदन, पार्टी विधान संशोधन तथा समसामयिक विषयमा पनि छलफल हुने कार्यसूची रहेको छ।
रास्वपाले महाधिवेशनको तयारीलाई तीव्र बनाइरहेका बेला बस्न लागेको केन्द्रीय समिति बैठकलाई महत्त्वपूर्ण रूपमा हेरिएको छ। बैठकबाट महाधिवेशनको मिति, तयारी र संगठनात्मक व्यवस्थापनका विषयमा आवश्यक निर्णयहरू हुन सक्ने अपेक्षा गरिएको छ।
बैठकका निर्णयहरू सार्वजनिक भएपछि पार्टीको आगामी संगठनात्मक दिशा र महाधिवेशन तयारीबारे थप स्पष्टता आउने विश्वास गरिएको छ।
