प्रेम जैरु, काठमाडौ । नेपालस्थित चिनियाँ दूतावासका प्रतिनिधिहरूले गोल्कुपाखा पिपलबोट ठमेलमा रहेको ओभरसिज फ्रेन्डसिप इन्टरनेशनल अस्पताललाई अत्याधुनिक एम्बुलेन्स हस्तान्तरण गरेका छन्। अस्पताल परिसरमा आयोजित एक विशेष समारोहका बीच दूतावासका अधिकारीहरूले अस्पताल व्यवस्थापनलाई एम्बुलेन्सको साँचो हस्तान्तरण गरेका हुन्।
कार्यक्रममा बोल्दै चिनियाँ दूतावासका प्रतिनिधिहरूले नेपालमा रहेका चिनियाँ नागरिक, अन्य पर्यटक तथा स्थानीय समुदायलाई समयमै स्वास्थ्य सेवा उपलब्ध गराउन अस्पतालले पुर्याउँदै आएको योगदानको प्रशंसा गर्दै। उनीहरूले नयाँ एम्बुलेन्सले आकस्मिक उद्धार, कन्सुलर संरक्षण तथा आपतकालीन स्वास्थ्य सेवामा थप प्रभावकारिता ल्याउने विश्वास व्यक्त गरे।
ओभरसिज फ्रेन्डसिप इन्टरनेशनल अस्पतालले विगत चार वर्षदेखि स्थानीय समुदाय, विदेशी पर्यटक तथा नेपालमा बसोबास गर्ने विभिन्न देशका नागरिकहरूलाई स्वास्थ्य सेवा प्रदान गर्दै आएको छ। अस्पताल व्यवस्थापनका अनुसार चिनियाँ दूतावासबाट प्राप्त नयाँ एम्बुलेन्स सञ्चालनमा आएपछि आपतकालीन उद्धार तथा बिरामी ओसारपसार सेवा थप सुदृढ हुनेछ। यसले हवाई उद्धारपछि बिरामीलाई अस्पतालसम्म सुरक्षित र छिटो पुर्याउने कार्यमा महत्वपूर्ण सहयोग पुर्याउने अपेक्षा गरिएको छ।
अस्पताल नेपालस्थित चिनियाँ दूतावासको कन्सुलर संरक्षण स्वयंसेवी इकाईका रूपमा समेत कार्यरत रहेको छ। अस्पतालले उच्च हिमाली क्षेत्रबाट उद्धार गरिएका बिरामी, उचाइजन्य रोग, मस्तिष्कघात, गम्भीर निमोनिया तथा अन्य जटिल स्वास्थ्य समस्याका बिरामीहरूको उपचारमा महत्वपूर्ण भूमिका निर्वाह गर्दै आएको छ। हालसम्म अस्पतालले दूतावाससँगको समन्वयमा दर्जनौं कन्सुलर सहायता तथा उद्धारका कार्यहरू सम्पन्न गरिसकेको जनाएको छ।
समारोहमा अस्पतालका पदाधिकारी, चिकित्सक, स्वास्थ्यकर्मी तथा चिनियाँ दूतावासका प्रतिनिधिहरू र काठमाडौं महानगरका प्रतिनिधि समेको उपस्थिति रहेको थियो। सहभागीहरूले नेपाल–चीन स्वास्थ्य सहकार्यलाई अझ प्रभावकारी बनाउँदै भविष्यमा पनि यस्ता सहयोगात्मक कार्यक्रमलाई निरन्तरता दिने प्रतिबद्धता व्यक्त गरेका थिए।
