काठमाडौं । संघीय संसद प्रतिनिधिसभाका सम्माननीय सभामुख डोल प्रसाद (डीपी) अर्यालले नेपाल र संयुक्त अरब इमिरेट्स (यूएई) बीचको आर्थिक, व्यापारिक तथा विकास साझेदारीलाई अझ विस्तार गर्नुपर्ने आवश्यकता औंल्याउनुभएको छ।
नेपालका लागि यूएईका राजदूत महामहिम अब्दुल्ला जरवान अल शम्सीसँग बिहीबार भएको शिष्टाचार भेटवार्ताका क्रममा सभामुख अर्यालले यूएई नेपाली श्रमिक, व्यापार तथा लगानीका दृष्टिले नेपालको महत्वपूर्ण साझेदार राष्ट्र रहेको उल्लेख गर्दै द्विपक्षीय सम्बन्धलाई थप सुदृढ बनाउनुपर्ने बताउनुभयो।
भेटका क्रममा सभामुख अर्यालले यूएईको भिसा प्रक्रियामा नेपाली नागरिकबाट प्रहरी प्रतिवेदन अनिवार्य रूपमा मागिने व्यवस्थालाई पुनर्विचार गरी सहज बनाउन आग्रह गर्नुभयो। उहाँले नेपाल सरकारले हालै सार्वजनिक गरेको शासकीय सुधारका १०० कार्यसूचीमार्फत सेवा प्रवाहलाई थप प्रभावकारी, पारदर्शी, डिजिटाइज्ड तथा नागरिकमैत्री बनाउने दिशामा काम अघि बढिरहेको जानकारी दिनुभयो।
सभामुख अर्यालले नेपाल लगानीकर्ताका लागि अनुकूल वातावरण निर्माण गर्न प्रतिबद्ध रहेको उल्लेख गर्दै यूएई भिजन २०३१ सँग तालमेल हुने गरी लगानी, पूर्वाधार, पर्यटन, ऊर्जा तथा प्रविधिका क्षेत्रमा सहकार्य विस्तार गर्न आग्रह गर्नुभयो।
उहाँले आगामी सेप्टेम्बर २३ देखि पोखरा–दुबई–पोखरा दैनिक सिधा उडान सञ्चालनको स्वीकृति प्राप्त भएकोमा खुशी व्यक्त गर्दै यसले पोखरालाई अन्तर्राष्ट्रिय हवाई सञ्जालसँग जोड्न महत्वपूर्ण भूमिका खेल्ने विश्वास व्यक्त गर्नुभयो। साथै, दुबई–भैरहवा–दुबई उडान पुनः सञ्चालनको सम्भावनाबारे समेत विचार गर्न आग्रह गर्नुभयो।
सभामुख अर्यालले प्रतिनिधिसभाको हालैको निर्णयअनुसार संसदीय मैत्री समूह गठन गरिएको जानकारी गराउँदै यसले नेपाल र यूएईका संसदबीच भ्रमण, अनुभव आदान–प्रदान तथा संसदीय अभ्यासको साझेदारीलाई थप सुदृढ बनाउने विश्वास व्यक्त गर्नुभयो।
जवाफमा राजदूत अल शम्सीले नेपाल–यूएई सम्बन्ध मैत्रीपूर्ण, सौहार्दपूर्ण र बहुआयामिक रहेको उल्लेख गर्दै व्यापार, लगानी, पर्यटन, ऊर्जा, प्रविधि तथा जनस्तरको सम्बन्धलाई अझ मजबुत बनाउन यूएई सरकार सकारात्मक रहेको बताउनुभयो। उहाँले नेपालसँगको सहकार्य विस्तार तथा पारस्परिक हितका क्षेत्रमा थप अवसरहरूको खोजी गरिने विश्वास व्यक्त गर्नुभयो।
भेटवार्तामा नेपाल–यूएई सम्बन्ध, संसदीय सहयोग, व्यापार, लगानी, पर्यटन, श्रम, हवाई सेवा, प्रविधि तथा कृत्रिम बौद्धिकता लगायतका विविध विषयमा छलफल भएको थियो।
