काठमाडौं। सम्माननीय सभामुख डोल प्रसाद (डीपी) अर्यालसँग नेपालका लागि बङ्गलादेशका राजदूत महामहिम मो. शफिकुर रहमानले शिष्टाचार भेटवार्ता गरेका छन्। भेटका क्रममा नेपाल–बङ्गलादेश सम्बन्ध, क्षेत्रीय सहकार्य तथा विकासका विविध विषयमा छलफल भएको छ।
भेटमा सभामुख अर्यालले नेपाल र बङ्गलादेशबीचको सम्बन्ध आपसी सम्मान, विश्वास र सार्वभौमिक समानतामा आधारित रहेको उल्लेख गर्दै नेपालले बङ्गलादेशसँगको मित्रवत् सम्बन्धलाई उच्च महत्व दिँदै आएको बताए। उनले बङ्गलादेशका जनताबाट प्राप्त जनादेशका आधारमा गठित सरकारलाई शुभकामना व्यक्त गर्दै जनसेवा, विकास र समृद्धिका लागि सफल कार्यकालको कामना गरे।
सभामुख अर्यालले नेपालमा पनि निर्वाचन सम्पन्न भई नयाँ सरकार गठन भइसकेको उल्लेख गर्दै दुवै देशबीचको सहकार्य अझ सुदृढ हुँदै द्विपक्षीय सम्बन्धले नयाँ उचाइ हासिल गर्ने विश्वास व्यक्त गरे। उनले बङ्गलादेशले हासिल गरेको आर्थिक तथा भौतिक विकासको प्रशंसा गर्दै त्यहाँका सफल अभ्यासहरू नेपालको विकास यात्रामा उपयोगी हुन सक्ने धारणा राखे।
खेलकुद क्षेत्रमा बढ्दो सहकार्यले दुई देशका जनताबीचको सम्बन्ध थप नजिकिएको उल्लेख गर्दै सभामुख अर्यालले फुटबल, क्रिकेट र भलिबलजस्ता खेलमार्फत युवा पुस्ताबीच मित्रता, सम्पर्क र आपसी समझदारी बढेको बताए। साथै पर्यटन, सांस्कृतिक आदानप्रदान र जनस्तरीय सम्पर्कमार्फत आगामी दिनमा सम्बन्ध अझ प्रगाढ हुने अपेक्षा व्यक्त गरे।
भेटका क्रममा शिक्षा, स्वास्थ्य, कृषि, जलवायु परिवर्तन तथा क्षेत्रीय सहकार्यका विषयमा समेत छलफल भएको थियो। सभामुख अर्यालले विशेषगरी बङ्गलादेशमा अध्ययनरत नेपाली विद्यार्थीहरूको योगदानको प्रशंसा गर्दै जलवायु परिवर्तनका साझा चुनौतीबारे दुवै मुलुकले मिलेर काम गर्नुपर्ने आवश्यकता औंल्याए।
राजदूत रहमानले नेपाल र बङ्गलादेशले जलवायु परिवर्तन, प्राकृतिक विपद्, विकास तथा आर्थिक रूपान्तरणका क्षेत्रमा समान प्रकृतिका चुनौतीहरू सामना गरिरहेको उल्लेख गर्दै ती समस्याको समाधानका लागि अनुभव आदानप्रदान र साझेदारीलाई थप प्रभावकारी बनाउनुपर्ने बताए।
उनले ऊर्जा, व्यापार, पर्यटन, शिक्षा, स्वास्थ्य तथा जनस्तरीय सम्बन्धका क्षेत्रमा विद्यमान सहकार्यलाई अझ विस्तार गर्न बङ्गलादेश सरकार सकारात्मक रहेको जानकारी दिँदै दक्षिण एसियाली क्षेत्रीय सहयोगलाई थप प्रभावकारी बनाउन साझा हितका विषयमा मिलेर काम गर्नुपर्नेमा जोड दिए।
