काठमाडौं । राष्ट्रिय स्वतन्त्र पार्टी (रास्वपा) बागमती प्रदेशको प्रथम प्रदेश अधिवेशनबाट उत्सव अर्याल प्रदेश सभापतिमा निर्वाचित भएका छन्। काठमाडौंको धुम्बाराहीस्थित स्मार्ट दरबार पार्टी प्यालेसमा सम्पन्न मतदानबाट अर्यालले प्रतिस्पर्धी डा. अच्युतम लामिछानेलाई पराजित गर्दै नेतृत्व हात पारेका हुन्।
प्रदेश सभापति पदका लागि सुरुमा चार जना आकांक्षी देखिए पनि काठमाडौंका कृष्णमान श्रेष्ठ र रामेछापका हरिबहादुर खत्रीले अर्याललाई समर्थन जनाएपछि प्रतिस्पर्धा मुख्यतः अर्याल र लामिछानेबीच सीमित भएको थियो। निर्वाचन परिणाम अनुसार खसेको कुल मत:- ८५७ मध्य उत्सब अर्यालले ४१६ सहित विजयी हुँदा प्रतिद्वन्द्वी डा: अच्युतम लामिछाने ४१४ पाएका थिए।
यसअघि हेटौंडामा आयोजना गर्ने तयारी गरिएको अधिवेशन विभिन्न कारणले स्थगित भएपछि काठमाडौंमा अधिवेशन काठमाडौंमा गरिएकाे हाे। लामो समयदेखि प्रतीक्षामा रहेको प्रदेश नेतृत्व चयन प्रक्रिया अन्ततः सम्पन्न भएसँगै बागमती प्रदेशले निर्वाचित नेतृत्व पाएको छ।
रास्वपाले संगठन सुदृढीकरण र प्रदेश तहमा पार्टी संरचनालाई प्रभावकारी बनाउने लक्ष्यका साथ अधिवेशन आयोजना गरेको थियो। बागमती प्रदेशलाई पार्टीको महत्वपूर्ण राजनीतिक आधार क्षेत्रका रूपमा हेरिने भएकाले यहाँको नेतृत्व चयनलाई पार्टीभित्र विशेष चासोका साथ हेरिएको थियो।
निर्वाचन परिणाम सार्वजनिक भएपछि विजयी सभापति अर्यालले पार्टीको नीति, सिद्धान्त र जनअपेक्षाअनुसार प्रदेश संगठनलाई थप सक्रिय, व्यवस्थित र प्रभावकारी बनाउने प्रतिबद्धता व्यक्त गरेका छन्। अधिवेशनबाट चयन भएको नयाँ नेतृत्वले आगामी दिनमा संगठन विस्तार, जनसम्पर्क वृद्धि तथा पार्टीका कार्यक्रमलाई प्रदेशभर प्रभावकारी रूपमा कार्यान्वयन गर्ने अपेक्षा गरिएको छ।
