काठमाडौं । श्रम संस्कृति पार्टीका अध्यक्ष हर्कराज राई ले देश र जनताको हितका लागि आवाज उठाउँदा आफू निरन्तर गाली र आलोचनाको निशाना बन्नुपरेको बताएका छन्।
शनिबार काठमाडौंमा आयोजित पार्टीको कार्यक्रममा बोल्दै अध्यक्ष राईले देशलाई माया गरेर काम गर्दा पनि अपमान र तिरस्कार सहनुपरेको गुनासो गरे। उनले आफू धरान को मेयर रहँदा दैनिक करिब एक हजार गाली सुन्नुपर्ने अवस्था रहेको स्मरण गर्दै अहिले त्यो संख्या बढेर दैनिक १० हजारसम्म पुगेको दाबी गरे।
राईले दार्चुला मा पुल निर्माणको पहल गर्दा समेत विभिन्न किसिमका आलोचना र विरोध खेप्नुपरेको उल्लेख गरे। सामाजिक सञ्जालमार्फत आफूविरुद्ध योजनाबद्ध रूपमा गाली अभियान सञ्चालन भइरहेको आशंका व्यक्त गर्दै उनले विवादका बाबजुद पुल निर्माण अन्तिम चरणमा पुगेको र छिट्टै उद्घाटन गरिने बताए।
उनले नेपाली समाजमा राम्रो कामको प्रशंसा गर्नेभन्दा खुट्टा तान्ने प्रवृत्ति बढी रहेको टिप्पणी गर्दै यस्तो मानसिकताको अन्त्य नभएसम्म देशले अपेक्षित विकास हासिल गर्न नसक्ने धारणा राखे। “आफू काम नगर्ने र अरूलाई पनि काम गर्न नदिने प्रवृत्तिले राष्ट्रलाई पछाडि धकेलिरहेको छ,” उनले भने।
अध्यक्ष राईले सीमा सुरक्षाको विषयमा समेत सरकारको ध्यानाकर्षण गराउँदै प्रधानमन्त्री बालेन्द्र साह को अभिव्यक्तिका कारण सुस्ता क्षेत्रमा भारतीय सेना प्रवेश गरेको आरोप लगाए। उनले राष्ट्रिय हित र सीमा सुरक्षाका सवालमा राज्य संवेदनशील बन्नुपर्नेमा जोड दिए।
कार्यक्रममा उनले विदेशी ऋणमा आधारित विकास मोडेल दिगो नहुने तर्क गर्दै स्वदेशी स्रोत, श्रम र उत्पादनमा आधारित आत्मनिर्भर अर्थतन्त्र निर्माण गर्नुपर्ने आवश्यकता औँल्याए। देशको विकासका लागि नागरिक, सरकार र राजनीतिक नेतृत्वबीच सहकार्य आवश्यक रहेको उनको भनाइ थियो।
