काठमाडौं । राष्ट्रिय स्वतन्त्र पार्टी (रास्वपा) बागमती प्रदेश अधिवेशनअन्तर्गत नयाँ नेतृत्व चयनका लागि मतदान जारी रहेको छ। यसअघि हेटौंडामा आयोजना गर्ने तयारी गरिएको अधिवेशन विभिन्न कारणले स्थगित भएपछि काठमाडौंको धुम्बाराहीस्थित स्मार्ट दरबार पार्टी प्यालेसमा मतदान प्रक्रिया सञ्चालन गरिएको हो।
प्रदेश सभापति पदका लागि उत्सव अर्याल र डा. अच्युतम लामिछानेबीच मुख्य प्रतिस्पर्धा भइरहेको छ। प्रारम्भमा चार जना आकांक्षी देखिए पनि काठमाडौंका कृष्णमान श्रेष्ठ र रामेछापका हरिबहादुर खत्रीले उत्सव अर्याललाई समर्थन जनाएपछि प्रतिस्पर्धा मुख्यतः दुई उम्मेदवारबीच केन्द्रित भएको हो।
श्रेष्ठ र खत्रीको समर्थनपछि अर्यालको पक्ष बलियो बनेको विश्लेषण गरिएको छ। अधिवेशनमा सहभागी प्रतिनिधिहरूको समर्थन र आन्तरिक समीकरणका आधारमा अर्यालको जितको सम्भावना उच्च रहेको बताइँदै आएको छ। यद्यपि लामिछाने पक्षले पनि अन्तिम समयसम्म प्रतिनिधिहरूको समर्थन जुटाउने प्रयासलाई तीव्र बनाएको छ।
रास्वपाले संगठन विस्तार र प्रदेश संरचनालाई थप प्रभावकारी बनाउने उद्देश्यका साथ प्रदेश अधिवेशनलाई महत्वका साथ अघि बढाएको छ। बागमती प्रदेशलाई पार्टीको राजनीतिक आधार क्षेत्रका रूपमा हेरिने भएकाले यहाँको नेतृत्व चयनलाई विशेष चासोका साथ हेरिएको छ।
अधिवेशनमार्फत सभापतिसहित प्रदेश कार्यसमितिका पदाधिकारी तथा सदस्यहरू चयन गरिने कार्यक्रम रहेको छ। मतदान सम्पन्न भएपछि मतगणना सुरु गरिने र अन्तिम परिणाम सार्वजनिक गरिने निर्वाचन समितिले जनाएको छ। नेतृत्व चयनपछि प्रदेश संगठनलाई थप सुदृढ बनाउने तथा आगामी राजनीतिक कार्यक्रमलाई प्रभावकारी रूपमा कार्यान्वयन गर्ने अपेक्षा गरिएको छ।
