इभी गाडी आयात सम्बन्धमा संसदीय छानबिन समिति चाहिन्छ : ज्ञानबहादुर शाही

प्रतिनिधिसभाको बिहीबारको बैठकमा राप्रपा संसदीय दलका नेता ज्ञानबहादुर शाही ले इभी गाडी आयात प्रक्रियामा केही शङ्का उत्पन्न भएकाले सत्यतथ्य सार्वजनिक गर्न संसदीय छानबिन आवश्यक रहेको बताएका हुन्।

उनले आफूहरूको माग अर्थमन्त्री डा. स्वर्णिम वाग्ले लाई काम गर्न अवरोध पुर्‍याउने उद्देश्यले नभई विषयलाई स्पष्ट पार्नका लागि भएको बताए।

शाहीले जेठ १ गतेदेखि १४ गतेसम्म करिब ३ हजार सवारी साधन आयात भएको र करसम्बन्धी व्यवस्था जेठ १४ गते पारित भए पनि त्यसको एक सातापछि, जेठ २१ गते नै गाडीहरू नाकाबाट भित्रिएको भन्दै त्यसमा आशङ्का व्यक्त गरे।

“जेठ १४ गते करसम्बन्धी व्यवस्था पारित भएको र २१ गते नै गाडीहरू नाकाबाट भित्रिएको घटनालाई करका दर वा नीतिमा भएको सम्भावित चलखेलका रूपमा नहेरेर के भन्ने ?” उनले संसद् बैठकमा प्रश्न गरे।

राप्रपाले इभी गाडी आयातसँग सम्बन्धित सम्पूर्ण प्रक्रिया र कर व्यवस्थाबारे निष्पक्ष छानबिन गरी वास्तविकता सार्वजनिक गर्न सरकारसँग माग गरेको छ।