काठमाडौं । प्रतिनिधिसभाको बैठक बुधबार केही समय तनावपूर्ण बनेको छ। स्वतन्त्र सांसद हर्क साम्पाङलाई बोल्न समय नदिएको भन्दै उनका समर्थक सांसदहरूले बैठकमा नाराबाजी र अवरोध गरेपछि संसद् केहीबेर प्रभावित भएको थियो।
साम्पाङ पक्षले सभामुखले आफूलाई बोल्न नदिएको आरोप लगाउँदै विरोध जनाइरहेका बेला सभामुख डोलप्रसाद अर्यालले संसद्को कार्यसूची अगाडि बढाएका थिए। सोही क्रममा उनले प्रतिनिधिसभा नियमावलीको नियम १३ बमोजिम १५ सदस्यीय कार्यव्यवस्था परामर्श समिति गठन भएको घोषणा गरेका हुन्।
संसद्मा जारी होहल्ला र नाराबाजीकै बीच सभामुख अर्यालले समितिका सदस्यहरूको नामावली सुनाएका थिए। प्रतिनिधिसभाको कार्यसञ्चालनलाई व्यवस्थित, प्रभावकारी र सहमतिमूलक बनाउन गठन गरिएको उक्त समितिमा विभिन्न राजनीतिक दलका प्रमुख प्रतिनिधिहरूलाई समेटिएको छ।
कार्यव्यवस्था परामर्श समितिले संसद्को कार्यसूची निर्धारण, बैठक सञ्चालनसम्बन्धी समन्वय तथा दलहरूबीच सहमति निर्माणमा महत्वपूर्ण भूमिका खेल्ने व्यवस्था छ।
