पोखरा । राष्ट्रिय स्वतन्त्र पार्टी (रास्वपा) गण्डकी प्रदेशको जेठ २९ गते हुने प्रदेश अधिवेशन नजिकिँदै जाँदा सभापति पदको प्रतिस्पर्धा थप रोचक बन्ने संकेत देखिएको छ। पार्टीभित्र वैकल्पिक राजनीति तथा सामाजिक अभियानका अभियन्ता डा. हरि कार्की सभापति पदका सम्भावित दाबेदारका रूपमा चर्चामा आएका छन्।
पार्टी स्रोतहरूका अनुसार डा. कार्की सभापति पदमा उम्मेदवारी दिने तयारीमा रहेको चर्चा गण्डकी प्रदेशका नेता–कार्यकर्तामाझ तीव्र बनेको छ। यद्यपि उनले हालसम्म आफ्नो उम्मेदवारीबारे औपचारिक घोषणा गरेका छैनन्।
लौरो अभियान र रास्वपाबीच भएको समायोजन प्रक्रियामार्फत पार्टीमा आबद्ध भएका कार्कीलाई वैकल्पिक राजनीतिक धाराका स्थापित अभियन्ताका रूपमा लिने गरिन्छ। लौरो अभियानसँग आबद्ध विभिन्न जिल्लाका अभियन्ताहरूको पार्टीभित्र समायोजन प्रक्रिया पनि जारी रहेको बताइन्छ।
शिक्षा र व्यवस्थापन क्षेत्रमा समेत लामो अनुभव रहेका कार्कीले २६ वर्षभन्दा बढी समय शिक्षण पेशामा बिताएका छन्। वित्त तथा लेखाशास्त्र विषयका विशेषज्ञ मानिने उनी हाल हिमाल कलेज अफ म्यानेजमेन्टका क्याम्पस प्रमुखका रूपमा कार्यरत छन्।
उनीसँग निकट रहेर काम गरेका नेता तथा कार्यकर्ताहरूका अनुसार कार्की संगठन निर्माण, रणनीतिक योजना तर्जुमा, समन्वय र व्यवस्थापनमा दक्ष व्यक्तित्व हुन्। विभिन्न समूहबीच संवाद र सहकार्यको वातावरण निर्माण गर्न सक्ने क्षमता उनका सबल पक्षका रूपमा लिइन्छ।
रास्वपा गण्डकी प्रदेश अधिवेशन नजिकिँदै जाँदा नेतृत्वका आकांक्षीहरूको चर्चा बढिरहेको छ। यस्तो अवस्थामा डा. कार्कीले उम्मेदवारी घोषणा गरेमा सभापति पदको प्रतिस्पर्धा थप आकर्षक, प्रतिस्पर्धात्मक र चासोको विषय बन्न सक्ने राजनीतिक वृत्तमा चर्चा छ।
