काठमाडौं । राष्ट्रिय स्वतन्त्र पार्टी (रास्वपा) को आगामी असार ६ र ७ गते चितवनमा हुने राष्ट्रिय महाधिवेशनको तयारी अन्तर्गत देशभर प्रदेश अधिवेशन सुरु भएको छ। मातहतका वडा, पालिका तथा जिल्ला अधिवेशन सम्पन्न गरेपछि रास्वपाले आजदेखि प्रदेश अधिवेशनको औपचारिक शुभारम्भ गरेको हो।
रास्वपाका प्रवक्ता मनिष झाले तोकिएको समयमै अधिकांश वडा, पालिका र जिल्ला अधिवेशन सम्पन्न भएको जानकारी दिँदै आजबाट प्रदेश अधिवेशन सुरु भएको बताएका छन्। उनका अनुसार जेठ २३ र २४ गते देशभरका अधिकांश जिल्ला अधिवेशन सम्पन्न भएका थिए।
प्रदेश अधिवेशनको पहिलो चरणअन्तर्गत बागमती प्रदेशको अधिवेशन आज हेटौंडामा सुरु हुँदैछ। हेटौंडास्थित हिमालयन दरबारमा हुने अधिवेशनको उद्घाटन पार्टी सभापति रवि लामिछानेले गर्ने कार्यक्रम तय भएको छ। बागमती प्रदेशपछि अन्य प्रदेशहरूको अधिवेशन पनि क्रमशः सञ्चालन गरिने जनाइएको छ।
बागमती प्रदेश नेतृत्व चयनका लागि सभापति पदमा प्रतिस्पर्धा हुने संकेत देखिएको छ। हालका प्रदेश सभापति डा. अच्युत्तम लामिछाने पुनः सोही पदमा दोहोरिने तयारीमा छन् भने प्रदेश समितिका वर्तमान प्रवक्ता उत्सव अर्याल पनि सभापतिको दाबेदारका रूपमा देखिएका छन्।
उपसभापति पदका लागि डा. रमेश ढकाल र मेनुका ठकुरी आकांक्षी रहेको प्रदेश नेताहरूले बताएका छन्। डा. ढकाल रास्वपाको प्रदेश स्वास्थ्य विभागमा आबद्ध हुनुका साथै शंखरापुर अस्पतालका सञ्चालकसमेत हुन्। यस्तै, वर्तमान महामन्त्री सुरेन्द्र भट्ट पुनः सोही पदमा निर्वाचित हुने तयारीमा छन्।
रास्वपाको विधानअनुसार बागमती प्रदेश समिति ६५ सदस्यीय हुनेछ। समितिमा सभापति, उपसभापति, महामन्त्री, दुई जना सहमहामन्त्री, कोषाध्यक्ष र प्रवक्ता रहने व्यवस्था छ। सहमहामन्त्रीमध्ये एक महिला र एक पुरुष हुनुपर्ने प्रावधान रहेको छ।
विधानअनुसार निर्वाचन आवश्यक परेमा नेतृत्व चयन दुई चरणमा हुनेछ। पहिलो चरणमा सभापति र प्रदेश सदस्यहरूको निर्वाचन गरिनेछ। त्यसपछि निर्वाचित प्रदेश सदस्यहरूमध्येबाट अन्य पदाधिकारी चयन गर्न प्रतिनिधिहरूले दोस्रो चरणको मतदान गर्ने व्यवस्था गरिएको रास्वपाले जनाएको छ।
रास्वपाले प्रदेश अधिवेशनमार्फत नयाँ नेतृत्व चयन गर्दै राष्ट्रिय महाधिवेशनको तयारीलाई अन्तिम चरणमा पुर्याउने लक्ष्य लिएको छ।
