खोटाङ । नेकपा एमालेभित्र नेतृत्व तहमा बढ्दो स्थिरता, पुस्तान्तरणको अभाव र युवा नेतृत्वलाई अवसर नदिइएको गुनासो चुलिरहेका बेला खोटाङका प्रभावशाली युवा नेता तथा दिक्तेल रुपाकोट मझुवागढी नगरपालिका–१४ का वडाध्यक्ष दिनेशकुमार राईले पार्टी परित्यागको घोषणा गरेका छन्।
लामो समयदेखि एमाले राजनीतिमा सक्रिय रहँदै आएका राईले सामाजिक सञ्जालमार्फत सार्वजनिक गरेको वक्तव्यमार्फत आफू आजको मिति २०८३ जेठ २५ गतेदेखि नेकपा एमाले तथा पार्टीका सम्पूर्ण कमिटी, जनसंगठन र जिम्मेवारीबाट अलग भएको घोषणा गरेका हुन्।
२०६४ सालदेखि एमालेको संगठित सदस्यका रूपमा राजनीतिक यात्रा सुरु गरेका राई राष्ट्रिय युवा संघ नेपाल खोटाङको जिल्ला सदस्य, जिल्ला अध्यक्ष, केन्द्रीय सचिवालय सदस्य, जिल्ला इन्चार्ज, युथ फोर्स इन्चार्ज तथा एमाले जिल्ला कमिटी सदस्य र सचिवालय सदस्यजस्ता महत्वपूर्ण जिम्मेवारीमा रहिसकेका नेता हुन्।
२०७४ र २०७९ को स्थानीय तह निर्वाचनमा एमालेकै तर्फबाट दिक्तेल रुपाकोट मझुवागढी नगरपालिका–१४ को वडाध्यक्षमा निर्वाचित भएका राईलाई एमालेको परम्परागत प्रभाव क्षेत्र बुइपाका बलिया युवा नेताका रूपमा चिनिन्थ्यो। दोस्रो कार्यकालमा पनि उनले भारी मतान्तरसहित विजय हासिल गरेका थिए।
राईले आफ्नो निर्णय कुनै व्यक्ति, समूह वा नेतृत्वप्रतिको व्यक्तिगत असन्तुष्टिका कारण नभई आफ्नै राजनीतिक मूल्य, विचार र आगामी यात्राको दिशाअनुसार लिएको बताएका छन्। उनले अब नयाँ ढंगले जनताको सेवा गर्ने संकल्पका साथ एमालेसँगको औपचारिक राजनीतिक सम्बन्ध समाप्त गरेको उल्लेख गरेका छन्।
तर राजनीतिक वृत्तमा भने राईको बहिर्गमनलाई एमालेभित्र बढ्दो नेतृत्व जडता र युवापुस्तामा चुलिएको निराशासँग जोडेर हेरिएको छ। पार्टीको शीर्ष नेतृत्वमा लामो समयदेखि उही अनुहार दोहोरिने, पुस्तान्तरणको बहस निष्कर्षमा नपुग्ने र युवालाई निर्णायक भूमिकामा स्थापित गर्न नसकिएको भन्दै एमालेभित्रै असन्तुष्टि बढ्दै गएको चर्चा हुने गरेको छ।
विशेषगरी आगामी भदौ २३–२४ गतेपछि पनि पार्टीको केन्द्रीय नेतृत्वमा कुनै सार्थक परिवर्तन नआए युवा पुस्ताको मोहभंग अझ तीव्र हुन सक्ने विश्लेषण एमाले वृत्तमै हुन थालेको छ। पार्टीमा दशकौं योगदान दिएका युवा नेताहरूले समेत आफ्नो राजनीतिक भविष्य अनिश्चित देख्न थालेपछि वैकल्पिक राजनीतिक बाटो रोज्ने प्रवृत्ति बढ्न सक्ने संकेत राईको निर्णयले दिएको टिप्पणी राजनीतिक विश्लेषकहरूको छ।
खोटाङमा एमाले संगठन निर्माण र युवा परिचालनमा महत्वपूर्ण भूमिका खेलेका राईको बहिर्गमनले जिल्ला राजनीतिमा मात्रै होइन, एमालेभित्रको युवा मनोविज्ञानबारे पनि गम्भीर प्रश्न खडा गरेको छ। लामो समय पार्टीका लागि काम गरेका युवा नेताहरू किन निरन्तर बाहिरिन बाध्य भइरहेका छन् भन्ने विषयमा नेतृत्वले आत्मसमीक्षा नगर्ने हो भने आगामी दिनमा यस्ता घटनाहरू थप बढ्न सक्ने राजनीतिक जानकारहरूको भनाइ छ।
राईले एमाले त्यागेसँगै उनको आगामी राजनीतिक यात्रा कुन दिशातर्फ मोडिने हो भन्ने विषयमा भने चासो बढेको छ। अहिलेका लागि उनले कुनै दलमा प्रवेश गर्ने घोषणा नगरे पनि उनको कदमलाई एमालेभित्रको नेतृत्व संकट र युवाको बढ्दो असन्तुष्टिको अर्को संकेतका रूपमा हेरिएको छ।
