म्याग्दी । म्याग्दी जिल्लामा निर्माण हुन लागेको १८० मेगावाट क्षमताको कालीगण्डकी गर्ज जलविद्युत् आयोजनाको मुख्य संरचना निर्माण कार्य सुरु भएको छ। कालीगण्डकी गर्ज हाइड्रोपावर प्रालिद्वारा प्रवर्द्धित आयोजनाले सोमबारदेखि अन्नपूर्ण गाउँपालिका–४ भालेबास क्षेत्रमा विस्फोटक पदार्थ प्रयोग गरी सुरुङ खन्ने काम थालेको हो।
आयोजना निर्देशक रमण सिंहका अनुसार चार वर्षभित्र सम्पन्न गर्ने लक्ष्य राखिएको यस आयोजनामा ५ किलोमिटर ६०० मिटर लामो सुरुङ निर्माण गरिनेछ। सुरुङ निर्माणका लागि भालेबास, गाडपार, घराप तथा अर्को एक स्थान गरी चार बिन्दुबाट काम अघि बढाइने तयारी गरिएको छ।
उनले मुस्ताङको थासाङ गाउँपालिका–४ घाँसामा बाँध निर्माण तथा म्याग्दीको अन्नपूर्ण गाउँपालिका–४ घरापमा विद्युत्गृह निर्माणको तयारी भइरहेको जानकारी दिए। आयोजनाको सिभिल निर्माणको जिम्मा साउथ एसियन इन्फ्रास्ट्रक्चरले लिएको छ र कम्पनीका प्राविधिक टोली आयोजनास्थलमा परिचालित भइसकेका छन्।
‘रन अफ द रिभर’ अवधारणामा आधारित यस आयोजनामा करिब एक किलोमिटर लामो पेनस्टक पाइपलाइन रहनेछ। विद्युत्गृह र आउटलेटबीचको उचाइ अन्तर ४८० मिटर रहेको बताइएको छ। साथै प्रवर्द्धक कम्पनी, निर्माण कम्पनी र नेपाली सेनाका लागि आवश्यक कार्यालय, आवास तथा विस्फोटक पदार्थ भण्डारण भवन निर्माण अन्तिम चरणमा पुगेका छन्।
आयोजनाका लागि हालसम्म आठ किलोमिटर पहुँचमार्ग निर्माण सम्पन्न भइसकेको छ भने गाडपार क्षेत्रमा बेलिब्रिज जडानको तयारी भइरहेको छ। उत्पादित विद्युत् राष्ट्रिय प्रसारण प्रणालीमा जोड्न घरापदेखि दाना क्षेत्रसम्म २२० केभी क्षमताको करिब एक किलोमिटर प्रसारण लाइन निर्माण गरिनेछ।
करिब ४० अर्ब रुपैयाँ लागत अनुमान गरिएको यस आयोजनामा ग्लोबल आइएमई बैंकको नेतृत्वमा लक्ष्मी सनराइज बैंक, हिमालयन बैंक र प्रभु बैंकको लगानी रहनेछ। आयोजनाका वरिष्ठ प्रबन्धक कृष्णदास श्रेष्ठका अनुसार प्रभावित क्षेत्रका स्थानीय बासिन्दाका लागि १० प्रतिशत सेयर छुट्याउने व्यवस्था गरिएको छ।
धार्मिक विधिपूर्वक पूजाआजा गर्दै आयोजना निर्माणको शुभारम्भ कार्यक्रममा स्थानीय जनप्रतिनिधि, समुदायका अगुवा, प्रवर्द्धक कम्पनी, निर्माण कम्पनी तथा सुरक्षा निकायका प्रतिनिधिहरूको सहभागिता रहेको थियो।
अन्नपूर्ण गाउँपालिका–४ का वडाध्यक्ष लोकबहादुर फगामीले कालीगण्डकी गर्ज म्याग्दी जिल्लामा हालसम्म निर्माण हुन लागेको सबैभन्दा ठूलो जलविद्युत् आयोजना भएको बताए। उनका अनुसार नारच्याङ क्षेत्रका नदीहरूमा यसअघि नै १६२ मेगावाट क्षमताका पाँच जलविद्युत् आयोजना सञ्चालनमा आइसकेका छन् भने कालीगण्डकी नदीमा थप जलविद्युत् आयोजना निर्माण तथा विस्तारको क्रम जारी छ।
