उदयपुर । राष्ट्रिय स्वतन्त्र पार्टी (रास्वपा) उदयपुरको प्रथम जिल्ला अधिवेशन सम्पन्न भएको छ। अधिवेशनबाट जिल्ला तथा क्षेत्रीय तहका विभिन्न पदाधिकारीहरू लोकतान्त्रिक निर्वाचन प्रक्रियामार्फत चयन भएका छन्। अधिवेशनले आगामी संगठन विस्तार र पार्टी गतिविधिलाई प्रभावकारी बनाउने उद्देश्यसहित नयाँ नेतृत्वलाई जिम्मेवारी सुम्पिएको छ।
जिल्ला सभापतिमा चित्रकुमार कार्की ११३ मत प्राप्त गर्दै निर्वाचित भएका छन्। उनका प्रतिस्पर्धी जनक बस्नेतले ८१ मत प्राप्त गरेका थिए। उपसभापतिमा किरण राउत १०१ मतसहित विजयी हुँदा कृष्णकुमारी घिमिरे श्रेष्ठले ८५ मत प्राप्त गरिन्। सचिव पदमा सूर्यबहादुर लामा ९६ मतसहित निर्वाचित भए भने भुवन खतिवडाले ७५ र जनार्दन कार्कीले २० मत प्राप्त गरेका थिए।
त्यसैगरी सह–सचिव पदमा सूर्यकुमार राई १११ मतसहित निर्वाचित भएका छन्। उनका प्रतिस्पर्धी हुकुममणि पाण्डेले ८२ मत प्राप्त गरे। जिल्ला सदस्य पदमा कौसिला कार्की १३८ मतसहित सर्वाधिक मत प्राप्त गर्दै निर्वाचित भइन्। साथै अम्बरबहादुर तामाङ १०० मत, गुरुदेव कार्की ९५ मत र हेमकुमारी चौधरी ९४ मतसहित सदस्यमा निर्वाचित भए।
जिल्ला सदस्य पदका अन्य उम्मेदवारमध्ये ससिला थापाले ९२, बब्लु गुप्ताले ७७, पवित्रा भट्टराईले ७३ तथा सुनिता चौधरीले ६५ मत प्राप्त गरेका थिए। निर्वाचनमा सहभागी प्रतिनिधिहरूले उत्साहजनक सहभागिता जनाएका थिए भने परिणाम सार्वजनिक भएसँगै निर्वाचित नेतृत्वलाई बधाई तथा शुभकामना व्यक्त गरिएको थियो।
क्षेत्रीय नेतृत्वतर्फ क्षेत्र नं. १ को सभापतिमा उद्दव अधिकारी ५९ मतसहित निर्वाचित भए। उनका निकटतम प्रतिस्पर्धी श्यामकुमार कार्कीले ५५ मत प्राप्त गरेका थिए। क्षेत्र नं. १ (ख) को उपसभापतिमा बासु थापा र पवन कार्की निर्विरोध निर्वाचित भए। यस्तै क्षेत्र नं. २ को सभापतिमा सामर्थ थापा ५५ मतसहित विजयी हुँदा मीनबहादुर खड्काले १७ मत प्राप्त गरे।
क्षेत्र नं. २ को उपसभापतिमा दिनेश कार्की ५० मतसहित निर्वाचित भए भने पूर्णकुमारी राउतले २३ मत प्राप्त गरिन्। नवनिर्वाचित नेतृत्वले संगठनलाई थप सशक्त र जनमुखी बनाउने प्रतिबद्धता व्यक्त गरेको छ।
