काठमाडौं । आगामी आर्थिक वर्ष २०८३/८४ का लागि सरकारले प्रस्तुत गरेको राजस्व र व्ययको वार्षिक अनुमान (बजेट) माथि छलफल गर्न प्रतिनिधिसभाको बैठक आज बिहान ११ बजे बस्दैछ।
संसद् सचिवालयले सार्वजनिक गरेको कार्यसूचीअनुसार बैठकमा अर्थमन्त्री डा. स्वर्णिम वाग्लेले आगामी आर्थिक वर्षको बजेटमाथि सामान्य छलफल प्रारम्भ गरियोस् भन्ने प्रस्ताव प्रस्तुत गर्नेछन्। प्रस्ताव पेश भएसँगै बजेटमाथिको सामान्य छलफल सुरु हुनेछ। छलफलका क्रममा सांसदहरूले उठाएका जिज्ञासा तथा प्रश्नहरूको जवाफ अर्थमन्त्री वाग्लेले दिने कार्यक्रम रहेको छ।
बैठकमा बजेटसँग सम्बन्धित विभिन्न महत्वपूर्ण विधेयकहरू पनि प्रस्तुत गरिनेछन्। अर्थमन्त्री वाग्लेले ‘विनियोजन विधेयक, २०८३’ सदनमा पेश गर्न अनुमति माग्ने प्रस्ताव राख्नुका साथै उक्त विधेयक प्रस्तुत गर्ने कार्यसूची रहेको छ। साथै, ‘राष्ट्र ऋण उठाउने विधेयक, २०८३’ र ‘नेपाल राष्ट्र बैंक (तेस्रो संशोधन) विधेयक, २०८३’ पनि संसद्मा पेश गरिनेछ।
यसैगरी, व्यवस्थापन कार्यअन्तर्गत संस्कृति, पर्यटन तथा नागरिक उड्डयनमन्त्री खड्कराज अधिकारीले राष्ट्रिय सभाबाट उत्पत्ति भएको ‘पर्यटन विधेयक, २०८२’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गर्नेछन्।
युवा, श्रम तथा रोजगारमन्त्री रामजी यादवले पनि दुई महत्वपूर्ण अन्तर्राष्ट्रिय श्रमसम्बन्धी दस्तावेज सदनमा पेश गर्ने कार्यसूची रहेको छ। तीमध्ये ‘अन्तर्राष्ट्रिय श्रम संगठन (ILO) को श्रम निरीक्षण सम्बन्धी महासन्धी, १९४७ (नम्बर ८१)’ तथा ‘बाध्यकारी श्रम महासन्धी, १९३० सम्बन्धी सन् २०१४ को प्रोटोकल नम्बर २९’ रहेका छन्।
संसद्का महासचिव पद्मप्रसाद पाण्डेयका अनुसार आजको बैठकमा बजेटमाथिको छलफलसँगै विभिन्न विधेयक तथा अन्तर्राष्ट्रिय महासन्धीसम्बन्धी प्रस्तावहरू पनि अघि बढाइनेछन्। बजेटमाथिको छलफललाई यस अधिवेशनको प्रमुख एजेन्डाका रूपमा हेरिएको छ।
