काठमाडौं । राष्ट्रिय स्वतन्त्र पार्टी (रास्वपा) कोशी प्रदेशमा संगठन विस्तार अभियानलाई तीव्रता दिँदै १४ जिल्लामध्ये ९ जिल्लाको जिल्ला अधिवेशन सम्पन्न गरेको छ। सम्पन्न अधिवेशनबाट सम्बन्धित जिल्लाहरूमा नयाँ नेतृत्व चयन भएको छ भने निर्वाचित सम्पूर्ण जिल्ला कार्यसमितिलाई पार्टीले बधाइ तथा सफल कार्यकालको शुभकामना व्यक्त गरेको छ।
अधिवेशन सम्पन्न भएका जिल्लाहरूमा सुनसरीबाट सागर दाहाल, झापाबाट ओम भण्डारी, ताप्लेजुङबाट राजन कुमार गुरुङ, मोरङबाट भरत कडेल, तेह्रथुमबाट सुमन खत्री, भोजपुरबाट ख्यामबहादुर भुजेल, संखुवासभाबाट भक्त नारायण श्रेष्ठ तथा ओखलढुंगाबाट कृष्णबहादुर थापा नेतृत्वमा निर्वाचित भएका छन्। नवनिर्वाचित नेतृत्वले पार्टीको संगठन सुदृढीकरण र जनस्तरसम्म पहुँच विस्तारमा भूमिका खेल्ने अपेक्षा गरिएको छ।
पार्टीले कोशी प्रदेशभर संगठनलाई थप प्रभावकारी बनाउने लक्ष्यसहित जिल्ला अधिवेशनलाई प्राथमिकतामा राखेको जनाएको छ। हालसम्म सम्पन्न अधिवेशनले स्थानीय तहदेखि प्रदेशस्तरसम्म संगठनात्मक संरचना मजबुत बनाउने आधार तयार गरेको पार्टीका नेताहरूको भनाइ छ।
यसैबीच, बाँकी पाँच जिल्ला धनकुटा, उदयपुर, सोलुखुम्बु, खोटाङ र इलाममा आइतबार अधिवेशन आयोजना गरिएको छ। ती जिल्लाबाट पनि नयाँ नेतृत्व चयन भएपछि कोशी प्रदेशका सबै जिल्लामा पार्टीको निर्वाचित जिल्ला कार्यसमिति गठन हुने र संगठन निर्माण अभियानले थप गति लिने विश्वास गरिएको छ।
