काठमाडौं । पूर्व जनयुद्धकालीन जनसेनाका कमाण्डर भरत ढुंगेल श्रम संस्कृति पार्टीमा आबद्ध भएका छन्। पार्टीको एक कार्यक्रममा सहभागी हुँदै उनले औपचारिक रूपमा सदस्यता ग्रहण गरेका हुन्। शारीरिक रूपमा घाइते तथा अपांग अवस्थामै कार्यक्रममा उपस्थित भएर सदस्यता लिएको पार्टीले जनाएको छ।
ढुंगेलले जनयुद्धका क्रममा सामन्ती व्यवस्थाविरुद्ध संघर्ष गरे पनि त्यसको भावना, उद्देश्य र मर्मलाई तत्कालीन नेतृत्वले जोगाउन नसकेको निष्कर्षमा आफू पुगेको बताए। जनयुद्धपछि अपेक्षित परिवर्तन हुन नसकेको भन्दै उनले लामो समय निराशा र अन्योलबीच जीवन बिताउनुपरेको उल्लेख गरे।
कार्यक्रममा उनले श्रम संस्कृति पार्टीले श्रम, उत्पादन र राष्ट्रिय स्वाभिमानलाई केन्द्रमा राखेर अघि सारेको विचारप्रति विश्वास व्यक्त गर्दै देश निर्माणको नयाँ आशा यही पार्टीमा देखेको बताए। पार्टीका नेताहरूले पनि श्रम संस्कृति र उत्पादनमुखी सोचमार्फत देशको विकास तथा परिवर्तन सम्भव रहेको धारणा राखेका थिए।
