काठमाडौँ । राष्ट्रिय स्वतन्त्र पार्टी (रास्वपा)ले देशभर संगठन निर्माण अभियानलाई तीव्रता दिँदै हालसम्म ४ हजार २ सय ४६ वडामा अधिवेशन सम्पन्न गरेको जनाएको छ। पार्टीको केन्द्रीय निर्वाचन आयोगका अनुसार अधिकांश वडा अधिवेशन सर्वसम्मत रूपमा सम्पन्न भएका छन्।
आयोगका अनुसार हालसम्म ५१२ स्थानीय तहमा पालिका अधिवेशन सम्पन्न भइसकेको छ भने थप चार नगरपालिका र चार वडामा संगठनात्मक समिति अद्यावधिक गरिएको छ। वडा र पालिका तहको अधिवेशन सम्पन्न भएसँगै अहिले देशभर जिल्ला अधिवेशन सञ्चालन भइरहेको छ।
रास्वपाका केन्द्रीय निर्वाचन आयोग प्रमुख भुवन केसीका अनुसार जिल्ला अधिवेशनको निर्वाचन प्रक्रिया निष्पक्ष, पारदर्शी र व्यवस्थित बनाउन प्रत्येक जिल्लामा तीन सदस्यीय निर्वाचन समिति परिचालन गरिएको छ। जिल्ला अधिवेशनमार्फत नयाँ जिल्ला नेतृत्व चयनका साथै आगामी कार्यदिशाबारे पनि छलफल हुने जनाइएको छ।
पार्टीले आगामी जेठ २६ गतेदेखि सातै प्रदेशमा प्रदेश अधिवेशन सुरु गर्ने तयारी गरेको छ। प्रदेश अधिवेशन सञ्चालनका लागि प्रत्येक प्रदेशमा पाँच सदस्यीय प्रदेश निर्वाचन समिति गठन गरी आवश्यक काम अघि बढाइसकिएको आयोगले जनाएको छ।
यसैबीच, रास्वपाले आफ्नो स्थापना दिवसको अवसर पारेर आगामी असार ७ गते चितवनमा पहिलो राष्ट्रिय महाधिवेशन आयोजना गर्ने भएको छ। पार्टी स्थापना भएको ४८ महिनापछि हुन लागेको महाधिवेशनले नयाँ नेतृत्व चयन गर्नुका साथै पार्टीको भावी राजनीतिक तथा संगठनात्मक मार्गचित्र तय गर्ने अपेक्षा गरिएको छ।
