खोटाङ । राष्ट्रिय स्वतन्त्र पार्टी (रास्वपा) खोटाङको प्रथम जिल्ला अधिवेशन आज जिल्ला सदरमुकाम दिक्तेलस्थित समीक्षा हलमा हुँदैछ। अधिवेशनको सम्पूर्ण तयारी पूरा भएको र जिल्ला भरका नेता–कार्यकर्ता, प्रतिनिधि तथा समर्थकहरूको उल्लेख्य सहभागिता रहने अपेक्षा गरिएको जिल्ला संयोजक मुकुन्द कृष्ण थापाले जानकारी दिए।
अधिवेशनको प्रमुख अतिथिका रूपमा रास्वपाकी नेतृ सृष्टि भट्टराई सहभागी हुने कार्यक्रम रहेको छ। अधिवेशनमा पार्टीको संगठनात्मक अवस्था, आगामी कार्ययोजना तथा जिल्लामा पार्टी विस्तारका विषयमा छलफल हुने जनाइएको छ।
रास्वपाको केन्द्रीय निर्देशनअनुसार जिल्लाभित्रका संगठनात्मक संरचनाको अधिवेशन प्रक्रिया अधिकांश रूपमा सम्पन्न भइसकेको छ। खोटाङका १० स्थानीय तहमध्ये ८ स्थानीय तह तथा ७९ वडामध्ये ५० वडाको अधिवेशन सम्पन्न भइसकेको र जिल्ला अधिवेशन त्यसैको निरन्तरता रहेको पार्टीले जनाएको छ।
जिल्ला अधिवेशनमा वडा, गाउँपालिका तथा नगरपालिकाबाट निर्वाचित प्रतिनिधिहरूको सहभागिता रहनेछ। अधिवेशनले नयाँ जिल्ला कार्यसमिति चयन गर्नुका साथै आगामी राजनीतिक तथा संगठनात्मक कार्यदिशा तय गर्ने अपेक्षा गरिएको छ।
