हुम्ला । राष्ट्रिय स्वतन्त्र पार्टी (रास्वपा) हुम्लाको पहिलो जिल्ला भेलाले लक्ष्मण ऐडीको नेतृत्वमा नौ सदस्यीय जिल्ला कार्यसमिति सर्वसम्मत रूपमा चयन गरेको छ। यसअघि जिल्ला उपसभापतिको जिम्मेवारीमा रहेका ऐडी अब जिल्ला सभापतिमा चयन भएका हुन्।
भेलाले रिन्जेन लामा उपसभापति, मनोज बाहेरा सचिव, तीर्थराज बुढा सहसचिव तथा कमन शाही कोषाध्यक्षमा सर्वसम्मत रूपमा चयन गरेको छ। नवगठित कार्यसमितिले जिल्लामा पार्टी संगठन विस्तार र सुदृढीकरणलाई प्राथमिकतामा राखेर काम गर्ने जनाएको छ।
त्यसैगरी कार्यसमितिको सदस्यमा नरेन्द्र बुढा, सुरेश बुढा, बाँचे बुढा र अस्मिता बुढा चयन भएका छन्। पहिलो जिल्ला भेलाले सर्वसम्मतिको आधारमा नयाँ नेतृत्व चयन गर्दै संगठनलाई थप सक्रिय बनाउने प्रतिबद्धता व्यक्त गरेको छ।
सभापतिमा चयन भएपछि लक्ष्मण ऐडीले हुम्लावासीको अपेक्षा र विश्वासलाई केन्द्रमा राखेर काम गर्ने तथा पार्टीलाई जनताको हित र सेवासँग जोडेर अघि बढाउने प्रतिबद्धता व्यक्त गरेका छन्। उनले संगठनलाई जिल्लाको सबै स्थानीय तहसम्म विस्तार गर्दै जनसरोकारका मुद्दामा सक्रिय भूमिका निर्वाह गर्ने बताए।
