म्याग्दी । राष्ट्रिय स्वतन्त्र पार्टी (रास्वपा) म्याग्दीको पहिलो जिल्ला अधिवेशनबाट युवराज रोकाको नेतृत्वमा नयाँ जिल्ला कार्यसमिति सर्वसम्मत रूपमा चयन भएको छ। शनिबार सम्पन्न अधिवेशनले आगामी कार्यकालका लागि नयाँ नेतृत्व चयन गरेको हो।
अधिवेशनबाट कल्पना खत्री उपसभापति, सुनिल शर्मा सचिव तथा हीराबहादुर बोगटी (सुरत) कोषाध्यक्षमा सर्वसम्मत चयन भएका छन्। नवनिर्वाचित पदाधिकारीहरूले जिल्लामा पार्टी संगठनलाई थप सुदृढ बनाउँदै जनतामाझ पार्टीको पहुँच विस्तार गर्ने प्रतिबद्धता व्यक्त गरेका छन्।
त्यसैगरी कार्यसमितिको सदस्यमा सागरकुमार शर्मा पौडेल, गुनमाया पुर्जा, युवराज सुवेदी, सरोज सुवेदी र पूर्णबहादुर खत्री चयन भएका छन्। नयाँ कार्यसमिति सर्वसम्मत रूपमा चयन भएको जानकारी नवनिर्वाचित सचिव शर्माले दिएका हुन्।
अधिवेशनले संगठन विस्तार, पार्टीको नीति तथा कार्यक्रमलाई प्रभावकारी रूपमा कार्यान्वयन गर्ने र जिल्लास्तरमा रास्वपाको गतिविधिलाई थप सक्रिय बनाउने लक्ष्यसहित नयाँ नेतृत्व चयन गरेको जनाइएको छ।
