रूपन्देही । कामना सेवा विकास बैंक लिमिटेडले आफ्नो संस्थागत सामाजिक उत्तरदायित्वअन्तर्गत शाखा कार्यालय सालझण्डीमार्फत सैनामैना नगरपालिका–१० स्थित पशुपति माध्यमिक विद्यालयलाई डस्टबिन सहयोग गरेको छ।
एक कार्यक्रमबीच बैंकका बुटवल क्षेत्र प्रमुख हेमन्त बाबु आचार्यले विद्यालयका प्रधानाध्यापक हरिप्रसाद थापालाई १२ थान डस्टबिन हस्तान्तरण गरेका हुन्। विद्यालय परिसरको सरसफाइ तथा फोहोर व्यवस्थापनलाई प्रभावकारी बनाउन सहयोगस्वरूप डस्टबिन प्रदान गरिएको बैंकले जनाएको छ।
कार्यक्रममा बोल्दै प्रधानाध्यापक थापाले विद्यालयमा स्वच्छ वातावरण कायम गर्न र विद्यार्थीमा सरसफाइसम्बन्धी सकारात्मक बानीको विकास गर्न यस्ता सहयोगले महत्त्वपूर्ण भूमिका खेल्ने बताए। उनले बैंकप्रति धन्यवाद व्यक्त गर्दै डस्टबिनको उचित प्रयोग गरिने प्रतिबद्धता व्यक्त गरे।
उनका अनुसार स्वच्छ विद्यालय, स्वस्थ विद्यार्थी र सफा समाज निर्माणका लागि फोहोर व्यवस्थापन अत्यन्त आवश्यक विषय हो। विद्यालयस्तरबाटै सरसफाइ र वातावरण संरक्षणबारे सचेतना फैलाउन सके समाजमा सकारात्मक प्रभाव पर्ने विश्वास उनले व्यक्त गरे।
कामना सेवा विकास बैंकले विभिन्न क्षेत्रका सामाजिक तथा शैक्षिक संस्थासँग सहकार्य गर्दै समुदायमुखी कार्यक्रम सञ्चालन गर्दै आएको छ। बैंकले आगामी दिनमा पनि शिक्षा, स्वास्थ्य, वातावरण तथा सामाजिक विकाससँग सम्बन्धित यस्ता कार्यक्रमलाई निरन्तरता दिने जनाएको छ।
