भक्तपुर। राष्ट्रिय स्वतन्त्र पार्टी (रास्वपा) भक्तपुर जिल्लाको प्रथम जिल्ला अधिवेशन आज सूर्यविनायकस्थित थापा पार्टी प्यालेसमा सम्पन्न भएको छ। बिहान ८ बजेदेखि सुरु भएको अधिवेशन जिल्ला सभापति रामेश्वर बस्नेतको अध्यक्षतामा सम्पन्न भएको हो। कार्यक्रमको उद्घाटन पार्टी संसदीय दलका उपनेता गणेश पराजुली ले गरेका थिए।
अधिवेशनमा ३५० भन्दा बढी नेता तथा कार्यकर्ताको सहभागिता रहेको थियो। अधिवेशनअन्तर्गत सचिव र सह–सचिव पदका लागि निर्वाचन सम्पन्न भएको थियो भने अन्य पदाधिकारी तथा सदस्यहरू सर्वसम्मत रूपमा चयन भएका थिए। निर्वाचनबाट सचिवमा सञ्जीव प्रजापति र सह–सचिवमा रामकृष्ण देउजा निर्वाचित भएका छन्।
रास्वपाका केन्द्रीय सदस्य सूरज प्रधानका अनुसार अधिवेशनले नयाँ जिल्ला कार्यसमिति चयन गर्दै संगठनलाई थप सुदृढ बनाउने प्रतिबद्धता व्यक्त गरेको छ।
कार्यक्रमलाई सम्बोधन गर्दै प्रमुख अतिथि पराजुलीले मुलुकमा सुशासन, पारदर्शिता र जनउत्तरदायी शासन व्यवस्था स्थापना गर्न राजनीतिक परिवर्तन आवश्यक रहेको उल्लेख गरे। उनले व्यवस्था परिवर्तनको पक्षमा उभिएका शक्तिहरूलाई सहयोग गर्न तथा परिवर्तनको विरोध गर्नेहरूलाई आफ्नो सोच सुधार्न आग्रह गरे।
त्यसैगरी कार्यक्रममा अतिथिका रूपमा उपस्थित भक्तपुर क्षेत्र नम्बर २ बाट निर्वाचित प्रतिनिधिसभा सदस्य राजीव खत्री ले राष्ट्रिय हित, सीमा सुरक्षा तथा विगतका राजनीतिक निर्णयहरूबारे धारणा राख्दै देशका प्रमुख राजनीतिक दलहरूले गरेका कामकारबाहीप्रति प्रश्न उठाए। उनले महाकालीलगायत सीमा सम्बन्धी विषयमा अहिले आवाज उठाउने नेताहरू विगतमा पनि राज्यसत्ताको महत्वपूर्ण जिम्मेवारीमा रहेको दाबी गरे।
उनले शेरबहादुर देउवा, केपी शर्मा ओली, माधवकुमार नेपाल, पशुपति शमशेर राणा तथा वर्तमान राष्ट्रपति रामचन्द्र पौडेल विभिन्न समयमा नेतृत्वदायी भूमिकामा रहँदा पनि यस्ता विषयहरू समाधान हुन नसकेको उल्लेख गरे।
अधिवेशनले नयाँ नेतृत्व चयनसँगै संगठन विस्तार, सुशासनको अभियानलाई थप प्रभावकारी बनाउने तथा जनताको अपेक्षाअनुसार पार्टी गतिविधि सञ्चालन गर्ने प्रतिबद्धता व्यक्त गरेको छ।
