कृष्ण कुँवर- पर्बत। सुदूरपश्चिम प्रदेश प्रहरी कार्यालयले देशभरका प्रदेश प्रहरी कार्यालयहरूमध्ये उत्कृष्ट कार्यसम्पादन गर्दै प्रथम स्थान हासिल गरेको छ।
डीआईजी ओमबहादुर रानाको नेतृत्वमा रहेको सुदूरपश्चिम प्रदेश प्रहरी कार्यालयले आर्थिक वर्षको ९ महिनाको कार्यसम्पादन मूल्याङ्कनमा ८५.११ प्रतिशत अंक प्राप्त गर्दै देशभर प्रथम स्थान हासिल गरेको हो।
यसअघि सम्पन्न अर्धवार्षिक मूल्याङ्कनमा पनि कार्यालयले ८०.२१ प्रतिशत नतिजासहित उत्कृष्ट प्रदर्शन गरेको थियो।
प्रहरी संगठनको कार्यसम्पादन, शान्ति–सुरक्षा व्यवस्थापन, सेवा प्रवाह तथा संगठनात्मक प्रभावकारिताका विभिन्न सूचकका आधारमा गरिएको मूल्याङ्कनमा सुदूरपश्चिम प्रदेश प्रहरी कार्यालय देशभरमै उत्कृष्ट बनेको छ।
यस उपलब्धिसँगै प्रहरी महानिरीक्षक (आईजीपी) दानबहादुर कार्कीले डीआईजी रानालाई नगदसहित सम्मान तथा पुरस्कृत गरेका छन्। हालै सम्पन्न निर्वाचनलाई शान्तिपूर्ण, मर्यादित र सफल बनाउन खेलेको भूमिकाको समेत उच्च मूल्याङ्कन गरिएको प्रहरी स्रोतले जनाएको छ।
सुदूरपश्चिम प्रदेश प्रहरी कार्यालयले समर्पण, सेवा र सुरक्षालाई प्राथमिकतामा राख्दै नागरिकमैत्री प्रहरी सेवा प्रवाह गरिरहेको छ। प्राप्त उपलब्धिले प्रदेश प्रहरीको मनोबल थप उच्च बनाएको तथा आगामी दिनमा अझ प्रभावकारी सेवा प्रदान गर्न प्रेरणा मिलेको छ ।
