भक्तपुर । राष्ट्रिय स्वतन्त्र पार्टी (रास्वपा) भक्तपुर जिल्ला समितिको प्रथम जिल्ला अधिवेशन शनिबार सूर्यविनायक नगरपालिका–६ स्थित थापा पार्टी प्यालेसको सभाहलमा सुरु भएको छ।
रास्वपा भक्तपुर जिल्ला सभापति रामेश्वर बस्नेतको सभापतित्वमा आयोजित अधिवेशनको उद्घाटन पार्टीका संसदीय दलका उपनेता तथा प्रतिनिधिसभा सदस्य गणेश पराजुलीले प्रमुख अतिथिका रूपमा गरेका हुन्।
अधिवेशनमा पार्टीका केन्द्रीय सदस्य सूरज प्रधान, प्रतिनिधिसभा सदस्यहरू रुकेश रञ्जित, राजिव खत्री, प्रमिला कुलुजु तथा कुसुम महर्जनको उपस्थिति रहेको थियो। साथै, रास्वपा भक्तपुर संघीय निर्वाचन क्षेत्र केन्द्रीय सम्पादन समिति सदस्य साजन विक, भक्तपुर RAT जिल्ला संयोजक रामकृष्ण देउजा, जिल्लाभित्रका नगर तथा वडा सभापतिहरू र पार्टीका नेता–कार्यकर्ताहरूको उल्लेखनीय सहभागिता रहेको आयोजकले जनाएको छ।
करिब ३०० देखि ३५० जनासम्मको उपस्थितिमा सुरु भएको अधिवेशनलाई जिल्लामा पार्टी संगठन विस्तार, नेतृत्व चयन तथा आगामी राजनीतिक कार्यदिशा निर्धारण गर्ने महत्वपूर्ण अवसरका रूपमा हेरिएको छ।
अधिवेशनबाट नयाँ जिल्ला नेतृत्व चयनसँगै संगठनात्मक सुदृढीकरण, जनसम्पर्क विस्तार तथा आगामी राजनीतिक रणनीतिसम्बन्धी महत्वपूर्ण निर्णयहरू हुने अपेक्षा गरिएको छ।
रास्वपाले जिल्लास्तरमा संगठनलाई थप प्रभावकारी र सक्रिय बनाउने लक्ष्यसहित अधिवेशन आयोजना गरेको जनाएको छ।
